Ոչինչ չի կարող սասանել հայ-ռուսական հարաբերությունների դաշնակցային բնույթը: Այս մասին դեկտեմբերի 19-ին լրատվամիջոցների ներկայացուցչների համար կազմակերպված ամանորյա ավանդական ընդունելության ժամանակ ասաց Հայաստանում ՌԴ արտակարգ եւ լիազոր դեսպան Իվան Վոլինկինը:
Նրա խոսքով՝ հեռացող տարին անցավ երկու երկրների միջեւ դիվանագիտական հարաբերությունների հաստատման 25-ամյակի նշանի ներքո, ինչը դրանց զարգացմանը նոր դինամիկա է հաղորդում:
2017 թվականին Հայաստանը եւ Ռուսաստանը իրենց շոշափելի ավանդը բերեցին ինչպես ԵՏՄ շրջանակում ինտեգրման գործընթացներին, այնպես էլ ՀԱՊԿ:
Դիվանագետը նշեց Հայաստանում Ռուսաստանի կողմից իրականացվող ծրագրերի մասին: «Շատերը, հավանաբար, չգիտեն, որ ՌԴ-ն որոշել է ՄԱԿ-ում իր վճարումների մի մասն ուղղել Հայաստանի տնտեսական աջակցությանը: Մասնավորապես՝ միջոցներ են ուղղվել գյուղերի համալիր զարգացմանը, այդ թվում՝ գյուղական տուրիզմին, անտառային հրդեհների դեմ պայքարին: ՌԴ միջոցներով երկար տարիներ իրականացվում է տարրական դասարանների հայ աշակերտներին սնունդով ապահովելու ծրագիրը»,- նշեց Վոլինկինը; Ավելի մանրամասն անդրադառնալով եվրասիական ինտեգրացիային՝ Ռուսաստանի դեսպանը նշեց 2 երկրների միջեւ ապրանքաշրջանառության աճը՝ ընդգծելով, որ ՌԴ-ում Հայաստանի գյուղատնտեսական արտադրանքը պահանջարկ ունի:
Անդրադառնալով վերջերս Մեղրիում բացված ազատ տնտեսական գոտուն՝ Վոլինկինը նշեց, որ ունեցած հնարավորությունների ճիշտ եւ լիարժեք օգտագործման դեպքում կարող են մեծ հեռանկարներ հայտնվել: Մասնավորապես՝ Հայաստանը կարող է դառնալ մի տեսակ հաբ, որը ներդրումներ կգրավի այն երկրների ձեռնարկություններ հիմնելու ձեւով, որոնք ԵՏՄ շուկա ուղղակի մուտք չունեն:
2017 թվականի համաշխարհային մասշտաբի մեծ հաջողությունների թվում Իվան Վոլինկինը նշեց Սիրիայում ԻԼԻՊ-ի դեմ պատերազմի փաստացի ավարտը, Սիրիան որպես ինքնիշխան եւ ամբողջական երկիր պահպանելը, ինչին հաջողվեց հասնել ՌԴ ՕՏՈՒ ակտիվ համագործակցության շնորհիվ: Համաշխարհային աշխարհաքաղաքականության ձախողումների թվում Վոլինկինը նշեց Ուկրաինայում ճգնաժամի շարունակվելը, Կիեւի կողմից մինսկյան համաձայնագրերի չկատարումը:
