Դեկտեմբերի 20-ին Գյումրիում տեղի է ունեցել Ռուսական գիտության եւ մշակույթի կենտրոնի մասնաճյուղի բացման հանդիսացոր արարողությունը, Գյումրիից փոխանցում է NEWS.am-ի թղթակիցը:
Բացման արարողությանը մասնակցել են ԱՊՀ, արտասահմանում բնակվող հայրենակիցների եւ միջազգային հումանիտար համագործակցության («Ռոսսոտրուդնիչեստվո») գործերով Դաշնային գործակալության ղեկավարի ժամանակավոր պաշտոնակատար Ալեքսեյ Ֆրոլովը, Հայաստանում ՌԴ արտակարգ եւ լիազոր դեսպան Իվան Վոլինկինը, Հայաստանում (Երեւան) Ռուսական գիտության եւ մշակույթի կենտրոնի տնօրեն Սերգեյ Ռիբինսկին, Շիրակի մարզպետ Արթուր Խաչատրյանը, Գյումրիի քաղաքապետ Սամվել Բալասանյանը, 2 երկրների մի շարք գերատեսչությունների եւ նախարարությունների ներկայացուցիչներ:
Նշենք, որ «Ռոսսոտրուդնիչեստվո»-ի եւ նրա արտասահմանյան հաստատությունների գործունեությունն ուղղված է միջազգային հումանիտար համագործակցության պետական քաղաքականության իրականացմանը, արտասահմանում ժամանակակից Ռուսաստանի մասին օբյեկտիվ պատկերացման տարածմանը նպաստելուն: Ներկայումս «Ռոսսոտրուդնիչեստվո»-ն 96 ներկայացուցչություններով ներկայացված է աշխարհի 81 երկրներում. Ռուսական գիտության եւ մշակույթի 72 կենտրոն կա 62 երկրում, դեսպանատների կազմում Գործակալության 24 ներկայացուցիչ՝ 22 երկրում:
«Ռոսսոտրուդնիչեստվո»-ի գործունեության առաջնահերթ ուղղությունն է ԱՊՀ երկրները, որոնցից յուրաքանչյուրում կա ռուսական գիտության եւ մշակույթի կենտրոն:
