Ազգային ժողովի արտահերթ նիստն այսօր մեկնարկել է վիճաբանությամբ: Իրարանցում է առաջացրել Դատական օրենսգրքում փոփոխությունների եւ լրացումների նախագիծը: «Ելք»-ը հայտարարել է, որ դեմ է քվեարկելու, «Ծառուկյան» խմբակցությունից Գեւորգ Պետրոսյանն էլ կոչ է արել չմասնակցել քվեարկությանը: Բանն այն է, որ այս օրինագծի ընդունման համար անհրաժեշտ էր պատգամավորների 3/5-ի ձայները, այսինքն՝ առնվազն 63 ձայն: Եվ երբ Արա Բաբլոյանը հայտարարել է քվեարկության արդյունքները՝ 63 կողմ, «Ելք»-ի պատգամավորները հակադարձել են. սխալ հաշվարկ է եղել:
Խորհրդարանի խոսնակը հայտարարել է, որ հաշվարկվել է նաեւ Արփինե Հովհաննիսյանի ձայնը, ով նամակով տեղեկացրել է իր դիրքորոշման մասին, իսկ Ռուստամ Մախմուդյանի ձայնը չի հաշվարկվել, քանի որ քվեարկության կոճակը չի աշխատել: Խնդիր է եղել նաեւ «Ծառուկյան» խմբակցությունից Նապոլեոն Ազիզյանի քվեարկության հետ կապված. պատգամավորը նախ «կողմ» է քվեարկել, իսկ հետո որոշել, որ սխալվել է, բայց նրա քվեն արդեն հաշվարկվել էր: Նիկոլ Փաշինյանի փաստարկները չեն համոզել Ազգային ժողովի նախագահին, կրկնակի քվեարկության պահանջն Արա Բաբլոյանը նույնպես մերժել է: Արդյունքում «Ելք»-ի պատգամավորները սկսել են աղմկել ու ձեռքով հարվածել սեղաններին: Խառնաշփոթին փորձել է վերջ դնել փոխխոսնակը: Հունից դուրս եկած Էդուարդ Շարմազանովը կարգուկանոն պահպանելու կոչ է արել:
«Ելք»-ի պատգամավորներն ի վերջո որոշել են լքել նիստերի դահլիճը: Շարմազանովը նրանց «բարի ճանապարհ» է մաղթել ու առաջարկել շարունակել աշխատանքը: Մինչ հեռանալը, սակայն, Փաշինյանը խոսքի իրավունք է խնդրել եւ խորհրդարանի քվեարկությունները «կոմեդիա» կոչել, որին իրենց խմբակցությունը մասնակցել չի ուզում:
Նապոլեոն Ազիզյանը խորհրդարանի միջանցքում լրագրողներին բացատրել է, թե ինչու է «շփոթվել» ու կողմ քվեարկել նախագծին: Ասել է՝ դիմել է Ազգային ժողովի քարտուղարություն եւ խնդրել չեղարկել իր քվեն: Էդուարդ Շարմազանովն էլ հավաստում է, որ քվեարկության ժամանակ նիստերի դահլիճում ո՛չ «Ծառուկյան» խմբակցությունից, ո՛չ անձամբ Նապոլեոն Ազիզյանից առարկություն չի եղել:
Հացադուլ հայտարարած ուսանողներից Յուրա Ավագյանի ինքնազգացությունը երեկ երեկոյան վատացել է: Նրան շտապօգնության մեքենայով հիվանդանոց են տեղափոխել: Մյուս հացադուլավորը՝ Դավիթ Պետրոսյանը, սակայն, նշում է, որ նա վերադարձել է ԵՊՀ եւ շարունակում է հացադուլը: Ուսանողի խոսքով՝ գիշերը լավ են անցկացրել: Հիշեցնենք, որ տարկետման իրավունքի սահմանափակման դեմ հանդես եկող ուսանողները դեկտեմբերի 18-ին հայտարարել էին իշխանության ներկայացուցիչների հետ շուրջ մեկ ամիս տեւած բանակցությունները դադարեցնելու եւ պայքարը վերսկսելու մասին: «Հանուն գիտության զարգացման» նախաձեռնության երկու անդամները հացադուլ են հայտարարել ու փակվել համալսարանի Ֆիզիկայի ֆակուլտետի լսարաններից մեկում:
Արարատի մարզում այսօր խոշոր վթար է տեղի ունեցել: Երեւան-Երասխ ավտոճանապարհին 53 տրանսպորտային միջոց է բախվել: Խոշոր պատահարի հետեւանքով 6 մարդ տարբեր վնասվածքներով հիվանդանոցներ է տեղափոխվել: Ականատեսների տեղեկացմամբ՝ վթարված մեքենաների շղթան շուրջ 1.5 կմ է ձգվել: Վթարի պատճառը, ըստ վարորդների, սառած ճանապարհն ու մառախուղն է:
Տոներին ընդառաջ թանկացումներն արդեն նկատելի են եւ, փորձագետների կարծիքով, գնաճը շարունակվելու միտում ունի: Ամանորի սեղանը Հայաստանի քաղաքացիներին 12 տոկոսով ավելի կարժենա, քան նախորդ տարի: Փորձագետ Բաբկեն Պիպոյանը հավաստում է, որ տոների մոտենալուն զուգահեռ սպառողական շուկայում իրական գնաճն ավելացել է 20 տոկոսով: Մասնավորապես, մսամթերքը թանկացել է 20 տոկոսով, ալկոհոլային խմիչքները՝ 12-13 տոկոսով: Բաբկեն Պիպոյանի կանխատեսմամբ՝ գնաճ է սպասվում նաեւ գյումթերքի շուկայում:
Դոլարը շարունակում է թուլանալ, իսկ եվրոն թանկացել է եւս մեկ դրամով: Դոլարի փոխարժեքը դեկտեմբերի 20-ին կազմել է 481 դրամ, եվրոյինը՝ 570, ռուբլունը՝ 8 դրամ 21 լումա, ֆունտինը՝ 644 դրամ:
Դեկտեմբերի 21-ի գիշերն ու 22-ի ցերեկը հանրապետության շրջանների մեծ մասում տեղումներ են սպասվում: Օդի ջերմաստիճանը 4-5 աստիճանով կբարձրանա: Երեւանում նույնպես ժամանակ առ ժամանակ տեղումներ կլինեն: Մայրաքաղաքում գիշերը կդիտվի +1+3, ցերեկը՝ +4+6 աստիճան տաքություն: