Կառավարությունն ամեն ինչ կանի, որ արտահանման ծավալների աճը շարունակվի: Այս մասին դեկտեմբերի 21-ին կառավարության նիստից հետո լրագրողների հետ զրույցում ասաց տնտեսական զարգացման եւ ներդրումների փոխնախարար Տիգրան Խաչատրյանը:
Նրա խոսքով՝ կառավարությունը կշարունակի նախկինում սկսած ապրանքների եւ ծառայությունների արտահանման մեծացման քաղաքականությունը, քանի որ տնտեսական աճը զգալիորեն պայմանավորված է արտաքին պահանջարկով: Խոսելով 2017-ին կանխատեսվող ՀՆԱ 7-տոկոսանոց աճի մասին՝ փոխնախարարը նշեց, որ կառավարության ծրագրով նախատեսված է 5 տոկոսի երկարաժամկետ ցուցանիշը, եւ դրա իրականացմանը կուղղվեն բոլոր ջանքերը:
ՀՆԱ աճի ապահովման ենթատեքստում նա նշեց նաեւ արտաքին միջավայրի կարեւորությունը: Ի պատասխան դիտարկմանը, թե Հայաստանում տնտեսական բարձր ցուցանիշներ են լինում ընտրություններին նախորդող տարում, եւ արդյոք կապ կա՞, փոխնախարարը նշեց, որ ցուցանիշների մասին թվերն են վկայում, այդ թվում եւ արտահանման, իսկ դրանք անհնար է «նկարել», եւ տնտեսական աճի մասին պնդումներն էլ հիմնավորված են: