2017 թվականին Հայաստանի եւ Չինաստանի հարաբերությունները միանգամայն նոր մակարդակի են հասել: Այս մասին դեկտեմբերի 22-ին լրագրողների հետ հանդիպման ժամանակ ասաց ԱԺ Արտաքին հարաբերությունների մշտական հանձնաժողովի նախագահ, ՀՀԿ փոխնախագահ Արմեն Աշոտյանը:
Նրա խոսքով՝ Հայաստանը Չինաստանի առաջարկած «Մեկ գոտի, մեկ ճանապարհ» մեգանախագծում հատուկ տեղ է գրավում, որը շատերը համեմատում են Մարշալի հայտնի նախագծի հետ: Աշոտյանը հավելեց, որ աշխարհաքաղաքական իրողությունները հաշվի առնելու դեպքում անհրաժեշտ է ընդգծել՝ հարցը բացառապես տնտեսական չէ, այլ, այնուամենայնիվ, աշխարհաքաղաքական հիմք ունի:
ՀՀԿ փոխնախագահի կարծիքով՝ Երեւանի եւ Պեկինի շահերը այս դեպքում համընկնում են: Արմեն Աշոտյանը շեշտեց, որ հաջորդ տարի մի քանի քայլեր կձեռնարկվեն, որոնք կնպաստեն տարածաշրջանում Չինաստանի դիրքերի ամրապնդմանը եւ ակտիվացմանը: Մասնավորապես՝ տարածաշրջանում կաճեն ներդրումնրի ցուցանիշները, ինչը տեղի կունենա «փափուկ ուժի» մեխանիզմների կիրառման ճանապարհով: