Եկող տարի հայ-ամերիկյան հարաբերությունների զարգացման նոր նախադրյալներ կհայտնվեն: Այս մասին դեկտեմբերի 22-ին լրագրողների հետ հանդիպման ժամանակ հայտարարեց ԱԺ Արտաքին հարաբերությունների մշտական հանձնաժողովի նախագահ, Հանրապետական կուսակցության փոխնախագահ Արմեն Աշոտյանը:
Ինչպես նշեց Աշոտյանը, վերջերս ԱՄՆ նախագահի վարչակազմը հրապարակեց երկրի Ազգային անվտանգության նոր հայեցակարգը, որի շնորհիվ ակնհայտ դարձան առաջիկա տարիների առաջնահերթությունները: «Հարկավոր է նաեւ հաշվի առնել, որ աշխարհում իրադրությունը, այս ամենով հանդերձ, բավականին անհանգիստ է, եւ միջազգային այն ինստիտուտները, որոնք երկար տարիներ գործել են, կանգնած են փոփոխությունների առջեւ»,- ասաց Աշոտյանը՝ հավելելով, որ Հայաստանը պետք է չափազանց զգույշ եւ հետեւողական լինի իր ազգային եւ պետական շահերն առաջ մղելիս, ինչպես նաեւ հասկանա տարածաշրջանային եւ միջազգային գլոբալ քաղաքականության մակարդակում տեղի ունեցողը:
Նա միաժամանակ ուշադրություն դարձրեց, որ 2017 թվականը նշանավորվել է հայ-իսրայելական հարաբերությունների նոր շնչով: Սա պայմանավորված է ոչ միայն ԱԳ նախարարների մակարդակով համագործակցությամբ, այլեւ խորհրդարանականների եւ հանրության ներկայացուցիչների: Անդրադառնալով հայ-թուրքական հարաբերություններին՝ Արմեն Աշոտյանը դրանք ներկայումս բոլոր ուղղություններով փակուղային որակեց:
