Մենք առաջարկներ կներկայացնենք, երբ աջ ղեկով մեքենաների ներմուծումն արգելող նախագիծը չեղարկվի կամ հետ կանչվի: Այս մասին, այսօր՝ դեկտեմբերի 21-ին, բողոք-ավտոերթի առաջ լրագրողների հետ զրույցում նշեց «Աջ ղեկ» նախաձեռնության համակարգող Գեւորգ Աճեմյանը:
Նրա խոսքով, իրենք ավտոերթով շարժվելու են դեպի Տրանսպորտի, կապի եւ տեղեկատվական տեխնոլոգիաների նախարարություն: «Նախնական տեղեկություններով, նախարար Վահան Մարտիրոսյանն արդեն պատրաստակամություն է հայտնել հանդիպել «Աջ ղեկ» նախաձեռնության համակարգող թիմի դեմ: Մենք կներկայացնենք մեր մտահոգությունները, եւ մեր առաջարկությունների մասին կխոսենք այն ժամանակ, երբ կփարատվեն մեր մտահոգությունները: Առաջարկները կլինեն, երբ նախագիծը չեղարկվի կամ հետ կանչվի»,-ասաց նա:
Հարցին, թե որոնք են լինելու իրենց առաջարկները, Աճեմյանն ասաց. «Օրինակ, եթե դուք արգելում եք աջ ղեկով մեքենա ներկրել, ապա այն վարորդները, որոնք ներկայում ունեն աջ ղեկով մեքենաներ, ապա գոնե նրանք պետք է ձախ ղեկով մեքենա ներկրելիս ազատվեն մաքսատուրքից: Բայց այս առաջարկները դեռ պետք է հղկվեն: Երբ կչեղարկվի այս նախագիծը, կարելի է խումբ ստեղծել, որտեղ կլինեն նաեւ մեր ներկայացուցիչները եւ նոր նախագիծ մշակել»:
Նշենք, որ ՀՀ տրանսպորտի, կապի և տեղեկատվական տեխնոլոգիաների նախարարությունը ներկայացրել է մի նախագիծ, որով առաջարկում է փոփոխություն կատարել «Ճանապարհային երթևեկության անվտանգության ապահովման մասին» օրենքում, որը հիմնավորվում է աջ ղեկով մեքենաների շահագործման տեխնիկապես վտանգավոր լինելով: Ըստ այդմ, առաջարկվում է 2018-ի ապրիլի 1-ից արգելել աջ ղեկով մեքենաների ներմուծումը:
