Պաղեստինի ու Իսրայելի կառավարական պատվիրակությունների ներկայացուցիչները Չինաստանի մայրաքաղաքում անցկացվող համատեղ սիմպոզիումի ժամանակ կողմ են արտահայտվել Երուսաղեմի կարգավիճակի որոշման խնդրի կարգավորման հարցում չափավոր մոտեցում դրսեւորելուն,արտահայտելով հարցի քաղաքական լուծումը գտնելու երկկողմանի ձգտում։ Այս մասին հայտնել է ՉԺՀ ԱԳՆ-ն, փոխանցում է ՏԱՍՍ-ը։
«Երկու կողմերը նշել են, որ անհրաժեշտ է ուժեղացնել չափավոր դիրքորոշումների դերը խաղաղ երկխոսության շրջանակում։ Ըստ նրանց արտահայտությունների՝ Պաղեստինի ու Իսրայելի քաղաքացիական հասարակայնությունը համագործակցության ճանապարհով ի վիճակի է երկու ժողովուրդներին ու նրանց ղեկավարություններին ապացուցել, որ երկու պետություններն էլ ունակ են միմյանց հետ խաղաղ գործընկերություն հարթել, հասնելով քաղաքական պայմանավորվածությունների»,- նշվում է հայտարարության մեջ, որը հրապարակվել է գերատեսչության կայքում՝ երկօրյա միջոցառման արդյունքներով։
Փաստաթղթից հետեւում է, որ սիմպոզիումի ժամանակ մասնակիցները հանգել են փոխըմբռնման այն հարցում, որ Երուսաղեմի խնդիրը պետք է կարգավորվի երկու պետությունների սկզբունքի հիման վրա։ «Սա միակ ճիշտ ծրագիրն է։ Պաղեստինի ու Իսրայելի առաջնորդները պետք է վերադառնան այս ծրագրի շուրջ իրենց պարտականությունների կատարմանը»,- ասել են կողմերը, փոխանցում է Չինաստանի ԱԳՆ-ն։
Սիմպոզիումի ժամանակ Պաղեստինի ու Իսրայելի ներկայացուցիչները կարեւորել են Չինաստանի դերակատարումը ու երկկողմանի կապերի բարելավման հեռանկարների քննարկման համար հարթակ տրամադրելու նախաձեռնությունը։
Դեկտեմբերի 21-ին ու 22-ին Պեկինում կայացել է պաղեստինաիսրայելական հարաբերությունների կարգավորման հարցերով սիմպոզիում։
ՀԻշեցնենք , որ դեկտեմբերի 6-ին ԱՄՆ նախագահ Դոնալդ Թրամփը հայտնել էր, որ եկել է ժամանակը Երուսաղեմը հրեական պետության մայրաքաղաք ճանաչելու համար ու կարգադրել էր Թել Ավիվից այնտեղ տեղափոխել ԱՄՆ դեսպանատունը։ Դրա հետեւանքով Պաղեստինի ու Իսրայելի հարաբերությունները կտրուկ վատացել էին՝ առաջացնելով մի շարք երկրների՝ այդ թվում Չինաստանի մտահոգությունը։