Բնական է, որ Վրաստանի կառավարությունը վրաց պատրիարքարանին է փոխանցել 19-րդ դարում կառուցված Թբիլիսիի Թանդոյանց սուրբ Աստվածածին եկեղեցին. սա ոչ առաջին, ոչ էլ վերջին դեպքն է: NEWS.am- ի հետ զրույցում նման կարծիք հայտնեց հուշարձանագետ Սամվել Կարապետյանը` եկեղեցին` վրա պատրիարքարանին հանձնելու մասին:
«Հայկական բազմաթիվ եկեղեցիներ, հուշարձանային կոթողներ են Վրաստանում յուրացվել, ընդ որում, բիրտ գործողություններով` ձեւափոխություններ, արձանագրությունների ոչնչացում, գերեզմաների անհայտացում, որմնանկարների վերացում: Սա առաջին դեպքը չէ, եւ իմ համար զարմանալի չէ, քանի որ անկախությունից հետո այս գործընթացը տեղի է ունենում եւ սա հերթական հանգրվանն է»,-ասաց հուշարձանագետը:
Նրա կարծիքով` Վրաստանում մեր մշակութային ժառանգության հետ նման կերպ վարվելը մեր եկեղեցական եւ քաղաքական իշխանության վերաբերմունքի կամ վերաբերմունքի բացակայության հետեւանքն է:
«Պետք է ունենալ պատիվ եւ պատվին տեր պետք է լինել, մենք ոչ մեկը ունենք, ոչ մյուսը: Մենք երբեւէ տեր չենք եղել մեր պատմական հիշողություններին: Եւ սա տարիներ շարունակ տեւող գործընթաց է, այսինքն այս կաթողիկոսի, այս իշխանության խնդիրը չէ միայն, միշտ այդպես է եղել եւ հիմա էլ շարունակվում է»,-ասաց Սամվել Կարապետյանը:
Նա ողջունեց Վրաստանում հայկական թեմի քայլերը, որոնք դիմել են պատկան մարմիններին, նաեւ պատրաստվում են դիմել դատարան` եկեղեցին հայկական թեմին վերադարձնելու հարցով:
Նշենք, որ 2017 թվականի հուլիսին Վրաստանի կառավարությունը վրաց պատրիարքարանին է փոխանցել 19-րդ դարում կառուցված Թբիլիսիի Թանդոյանց սուրբ Աստվածածին եկեղեցին: Հանդուրժողականության եւ բազմազանության ինստիտուտը ծավալուն զեկույց է ներկայացրել, որ եկեղեցին հայկական է: Հոդվածում ասվում է, որ «այս ուսումնարանը կառուցվել է անձնական միջոցներով, թբիլիսցի այրի Կեկել Գրիգորյան-Թանդոյանցի կողմից, իր եղբայր Ալեքսանդրե Գրիգորյան-Բաբասյանի աջակցությամբ, իր և այս եկեղեցին կառուցողների հոգիների փրկության համար, ովքեր հուղարկավորված են այս տաճարում ՝ Սահակ Թանդոյանցի եկեղեցում … 1883 թվական»: