Մոսկվան կոչ է անում Հյուսիսային Կորեային եւ ԱՄՆ-ին բանակցություններ սկսել եւ պատրաստ է նպաստել դրան։ Այս մասին հայտարարել է Ռուսասատանի արտաքին գործերի նախարար Սերգեյ Լավրովը, հաղորդում է «ՌԻԱ Նովոստի»-ն։
«Կոչ ենք անում գործընկերներին կենտրոնանալ Կորեայի թերակղզում բանակցությունների միջոցով կոնկրետ խնդիրների լուծման վրա: Եվ դրա համար հարկավոր է ոչ թե Փհենյանի հետ շփումները խզել, այլ ընդհակառակը՝ զարգացնել», - ասել է ՌԴ նախարարը:
«Մենք համոզված ենք, որ ոչ միայն Հյուսիսային Կորեան, այլ նաեւ ԱՄՆ ու նրա դաշնակիցները պետք է ձեռնպահ մնան ցանկացած քայլից, որը կարող են ճգնաժամի հանգեցնել եւ, ի վերջո, սկսել բանակցային գործընթաց: Ռուսաստանը ամեն կերպ կնպաստի դրան»,-վստահեցրել է ՌԴ արտգործնախարարը:
Միեւնույն ժամանակ, նա նշել է, որ Ռուսաստանը չի կիսում Փհենյանի վրա «առավելագույն ճնշում» գործադրելու եւ երկրի ամբողջական շրջափակման ձգտումը:«Իհարկե, մենք լրջորեն մտահոգված ենք Հյուսիսային Կորեայի միջուկային կարգավիճակի հասնելու ցանկությամբ: Մենք երբեք չենք ընդունի կամ հավանություն չենք տա դրան: Այս ուղղությամբ Փհենյանի ձեռնարկած քայլերը հղի են համաշխարհային չտարածման ռեժիմը խարխլելու վտանգով: Իսկ Կորեայի թերակղզում առկա լարված իրավիճակը պարզապես վտանգավոր է»,-պարզաբանել է ՌԴ նախարարը:
Ավելի վաղ Պետդեպարտամենտի պաշտոնական ներկայացուցիչ Հեզեր Նաուերտը հայտարարել էր, որ ԱՄՆ-ն այս պահին հնարավոր չի համարում Հյուսիսային Կորեայի հետ բանակցությունները: Սպիտակ Տունը հստակեցրել էր, որ բանակցությունների սկսման համար նախ Փհենյանը պետք է դադարեցնի միջուկային եւ հակահրթիռային փորձարկումները, որը փաստացի նախապայմանն է։
Հյուսիսային Կորեան, իր հերթին, հայտարարել էր, որ համաձայն չէ ԱՄՆ-ի հետ քննարկել իր միջուկային ծրագիրը, քանի որ տեսնում է ՄԱԿ-ի Անվտանգության խորհրդում Հյուսիսային Կորեայի դեմ պատժամիջոցներ սահմանող բանաձեւ ընդունելու Վաշինգթոնի նախաձեռնությունը: