Արդեն երրորդ օրը Լարսի անցակետի փակ լինելու պատճառով խցանման մեջ են հայտնվել նաեւ հայկական համարանիշերով ավտոբուսներ եւ բեռնատարներ: NEWS.am-ի հետ զրույցում ԱԻՆ մամուլի ծառայությունից տեղեկացրին՝ կոնկրետ քանի հայկական մեքենա կա փակ անցակետում, այս պահին դեռ պարզ չէ. Լարսի անցակետում կուտակումներ են առաջացել, հաշվառում դեռ չի կատարվել եւ հստակ տեղեկություններ չկան ՀՀ քաղաքացիների վերաբերյալ: Փորձեցինք տեղեկություններ ճշտել նաեւ Վրաստանում Հայաստանի դեսպանատնից, որտեղից տեղեկացրին, որ այս պահի դրությամբ հայկական համարանիշերով մեքենաների մասին հստակ տեղեկություններ չեն կարող հաղորդել:
Նշենք, որ Վրաստանի ՆԳՆ ԱԻ դեպարտամենտից ստացված տեղեկատվության համաձայն Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար: ՌԴ ԱԻՆ Հարավային Օսեթիայի ՃԿԿ-ից ստացված տեղեկատվության համաձայն, ռուսական կողմում կա կուտակված 282 տրանսպորտային միջոց, որից 247-ը բեռնատար, 32 մարդատար ավտոմեքենա եւ 3-ը ավտոբուս են:
