Ոստիկանությունը ձրբակալել է ավտոբուսի վարորդին, որ Մոսկվայի արեւմուտքում «Սլավյանսկի բուլվար» կայարանի մոտ մխրճվել էր ստորգետնա անցումի մեջ, հայտնել է արտակարգ իրավիճակների ծառայությունում աղբյուրը, փոխանցում է «ՌԻԱ Նովոստի»-ն:
«Վարորդը ձերբակալված է, նրան ոստիկանական բաժին են տեղափոխում՝ հետագա պարզաբանումների համար»,- ասել է նա:
Տարբեր տեղեկություններով՝ վթարի հետեւանքով՝ 4-5 մարդ է զոհվել, մոտ 15-ը վնասվածքներ է ստացել:
Աղբյուրը հայտնել է, որ առայժմ 2 վարկած է դիտարկվում՝ ավտոբուսի ճանապարհը կա՛մ ուրիշ մեքենա է «կտրել», կա՛մ արգելակները չեն գործել: Ահաբեկչության վարկած չի դիտարկվում, նշել է գործակալության զրուցակիցը:
Ավտոբուսի վթարի վայր է եկել Մոսկվայի քաղաքապետ Սերգեյ Սոբյանինը:
Քաղաքապետը զննել է վթարի վայրը եւ ուղղվել է դեպի օպերատիվ շտաբ: Վթարի վայրը ոստիկանները շրջափակել են, լրագրողներին արգելափակոցից ներս մտնել չեն թույլատրում: