Հայաստանի փոքր եւ միջին ձեռնարկությունները 2018 թվականից կարող են միջազգային շուկաներ դուրս գալ ընդհանրական բրենդով։Այս մասին դեկտեմբերի 25-ին լրագրողների հետ հանդիպման ժամանակ հայտարարեց գյուղատնտեսության փոխնախարար Ռոբերտ Մակարյանը:
Նա հիշեցրեց, որ վերջերս Գյուղատնտեսության նախարարությունը հայտարարել է երկրում ընդհանրական արտահանման ընկերության ստեղծման մասին, որի նպատակն է համախմբել հայկական ՓՄՁ-ների ընդհանրական բրենդի ներքո եւ արտադրել միասնական որակի եւ ստանդարտների արտադրանք:
«ՓՄՁ-ները բավարար ռեսուրսներ չունեն մարքեթինգի եւ գովազդային արշավների անցկացման համար, եւ, հետեւաբար, իրենց ապրանքների իրացման ժամանակ լուրջ խնդիրների առաջ են կանգնում: Միեւնույն ժամանակ, մարզերի համար դրանք սոցիալական նշանակություն ունեն, քանի որ լուծում են զբաղվածության, բնակչության կենսամակարդակի բարձրացման եւ գյուղացիների եկամուտների խնդիրներ»,-ասաց Ռոբերտ Մակարյանը:
Փոխնախարարի խոսքով՝ ընդհանրական բրենդը եւ միասնական որակի արտադրանքը թույլ կտա հայաստանյան ՓՄՁ-ներին մրցակցել արտաքին շուկաներում՝ ոչ միայն ԵՏՄ-ում, այլ նաեւ Եվրոպայում եւ ԱՄՆ-ում: