Անցնող տարին հայ-վրացական հարաբերություններում նշանավորվեց դիվանագիտական հարաբերությունների հաստատման 25-ամյակով, նաեւ երկարաժամկետ հեռանկարային ծրագրերի առկայությամբ։ Այդ մասին հայտարարել է Հայաստանի նախագահ Սերժ Սարգսյանը՝ Թբիլիսիում Վրաստանի նախագահ Գեորգի Մարգվելաշվիլիի հետ հանդիպմանը։ Այդ մասին հաղորդում է NEWS.am-ի թղթակիցը Թբիլիիսից։
«Մեր երկրների միջեւ իսկապես բարիդրացիական հարաբերություններ են։ Պատահական չէ, որ Հայաստանի քաղաքացիները նախընտրում են իրենց արձակուրդն ու տոները նշել Վրաստանում»,- նկատել է Սարգսյանը։
Նրա խոսքով, ակնհայտ է, որ եթե հայերի նկատմամբ Վրաստանում բարեկամական վերաբերմունք չլիներ, նման զբոսաշրջային հոսք չէր լինի։
Նախագահը նաեւ նշել է, թե վրացի գործընկերոջ հետ հանդիպմանը քննարկվել են էներգետիկայի ոլորտի հետ կապված հարցեր, նաեւ երկու երկրների միջեւ տարանցման հնարավորությունները։ «Քննարկվել են տարանցային հնարավորություններն ու դրանք արդյունավետ օգտագործումը։ Օրակարգում էին նաեւ զբոսաշրջության, տեղեկատվական տեխնոլոգիաների, համատեղ արդյունաբերական ընկերությունների ստեղծման հարցերը»,- ասել է նախագահը։
Նշենք, որ Սերժ Սարգսյանը Վրաստանում է երկօրյա պաշտոնական այցով։ Այցի շրջանակներում նա նաեւ հանդիպելու է վարչապետ Գեորգի Կվիրիկաշվիլիի, խորհրդարանի նախագահ Իրակլի Կոբախիձեի, կաթողիկոս Իլյա 2-րդի հետ։