Նախագահ Սերժ Սարգսյանը տիկնոջ հետ պաշտոնական այցով Վրաստան է ժամանել: Դիմավորման պաշտոնական արարողությունից հետո Վրաստանի նախագահի նստավայրում մեկնարկել է Սերժ Սարգսյանի եւ Գեորգի Մարգվելաշվիլիի առանձնազրույցը, որի հաջորդել են ընդլայնված կազմով հայ-վրացական բարձր մակարդակի բանակցությունները:
Վրացի գործընկերոջ հետ համատեղ մամուլի ասուլիսում էլ Սերժ Սարգսյանն ընդգծել է, որ Վրաստանը ԵՏՄ երկրներում իր արտադրանքի արտահանման եւ վաճառքի նպատակով կարող է օգտագործել Հայաստանի հնարավորություններն ու ազատ առեւտրի գոտիների առկայությունը: NEWS.am-ի թղթակիցը Թբիլիսիից հաղորդում է, որ նախագահը խոսել է նաեւ հայ-իրանական սահմանին բացված ազատ առեւտրի գոտու մասին՝ նշելով, որ այն նույնպես Վրաստանի համար հիանալի հնարավորություն է: Գործընկերներն անդրադարձել են նաեւ տարածաշրջանային անվտանգության եւ կայունության հարցերի՝ կարծիք հայտնելով, որ երկարաժամկետ հակամարտությունները պետք է լուծվեն միայն համաձայնեցված ձեւաչափերում խաղաղ բանակցությունների միջոցով: Այցի շրջանակում Հայաստանի նախագահը կհանդիպի նաեւ Վրաստանի վարչապետի, խորհրդարանի խոսնակի եւ Վրաց պատրիարք Իլյա 2-րդի հետ: Վաղն արդեն՝ դեկտեմբերի 26-ին Սերժ Սարգսյանն աշխատանքային այցով կմեկնի Ռուսաստան: Մոսկվայում նա կմասնակցի ԱՊՀ անդամ պետությունների ղեկավարների ոչ պաշտոնական հանդիպմանը:
Պոլիտեխնիկական համալսարանի բակում տեղադրված տոնածառի տակ այսօր կասկածելի տուփ են գտել: Դեպքի վայր մեկնած փրկարարները տարհանել են համալսարանում գտնվողներին: Ավելի ուշ պարզվել է, որ տուփի մեջ 4 հատ տոնական ճայթուկ եւ 3 շիշ խմիչք է: Տուփի վրա գրված է եղել համալսարանի ռեկտորի անունը: Առայժմ տեղեկություններ չկան այն մասին, թե ով է աղմուկ բարձրացրած կատակի հեղինակը:
Մոսկվայում ողբերգական պատահար է տեղի ունեցել. ավտոբուսը մխրճվել է մարդկանց բազմության մեջ: Այն դուրս է եկել ճանապարհի երթեւեկելի գոտուց եւ հայտնվել հետիոտնի համար նախատեսված ստորգետնյա անցման աստիճաններին: Վրաերթի հետեւանքով 5 մարդ է զոհվել, 15 տուժած կա: Ավտոբուսի վարորդը ձերբակալվել է: Առայժմ պատահարի երկու վարկած է դիտարկվում. կա՛մ վարորդը փորձել է խուսափել այլ մեքենայի հետ բախումից, կա՛մ խափանվել են ավտոբուսի արգելակները:
Երեք օր շարունակ վրաց-ռուսական սահմանի Վերին Լարսի անցակետը փակ էր: Արդյունքում հայկական համարանիշերով բազմաթիվ բեռնատար եւ մարդատար մեքենաներ սահմանին խցանման մեջ են հայտնվել: Պատճառը Վրաստանում՝ Կազբեգի անցակետի հատվածում իրականացվող ձնամաքրման աշխատանքներն են. այստեղ ձնահոսքի վտանգ կա: Ռուսական աղբյուրների փոխանցմամբ՝ ռուսական կողմում 282 տրանսպորտային միջոց է կուտակվել, որից 32-ը մարդատար ավտոմեքենա են, եւս 3-ը՝ ավտոբուս:
Դոնի Ռոստովում Հայաստանի գլխավոր հյուպատոսությունն էլ տեղեկացնում է, որ Վերին Լարսում մնացած Հայաստանի քաղաքացիներին Ռուսաստանի ԱԻՆ-ը վրաններ է տրամադրել, ինչպես նաեւ դաշտային խոհանոց՝ քաղաքացիներին տաք սնունդ եւ անհրաժեշտ այլ օգնություն ցուցաբերելու համար: Օրվա երկրորդ կեսին արդեն անցակետը բացվել է մարդատար մեքենաների համար:
Արմավիրի մարզպետի խորհրդականի սպանության գործով դատահոգեբուժական փորձաքննության եզրակացությունը ստացվել է. ամուսնուն սպանելու մեջ մեղադրվող Ռուզաննա Մկրտչյանը մեղսունակ է ճանաչվել: Համալիր փորձաքննության արդյունքների համաձայն՝ կինը երբեք հոգեկան հիվանդությամբ չի տառապել եւ չի տառապում: Նշենք, որ Մանուկ Սիմոնյանին սպանելու մեջ մեղադրվող 46-ամյա Ռուզաննա Մկրտչյանը կալանավորված է:
Հիշեցնենք, որ պաշտոնյային մահացած էին հայտնաբերել հուլիսին: Ըստ տեղեկությունների՝ կինը պարբերաբար բռնության է ենթարկվել Մանուկ Սիմոնյանի կողմից: Ամուսինների միջեւ հերթական վիճաբանությունը տեղի է ունեցել հուլիսի 22-ին: Դրանից հետո Սիմոնյանը քնել է, իսկ կինը կացնով սպանել է ամուսնուն եւ որդու օգնությամբ մարմինը թաքցրել մարզի Դալարիկ գյուղի մերձակա ձորում: Պաշտոնյայի դին հայտնաբերել են 4 օր անց:
Հայաստանի տարվա լավագույն մարզիկ է ճանաչվել Հենրիխ Մխիթարյանը: Սպորտի եւ երիտասարդության հարցերի նախարարության անցկացրած «Տարվա 10 լավագույն մարզիկների» մրցույթի արդյունքներով երկրորդ տեղում օլիմպիական չեմպիոն Արթուր Ալեքսանյանն է, լավագույն եռյակը եզրափակում է հայկական շախմատի առաջատար Լեւոն Արոնյանը: Նշենք, որ տարվա լավագույն մարզիկների տասնյակը կազմվել է SMS քվեարկության եւ մարզական լրագրողների քվեարկության արդյունքում: Ի դեպ՝ լրագրողների քվեարկությամբ առաջին տեղում Արթուր Ալեքսանյանն է եղել, սակայն SMS քվեարկության արդյունքում մեծ առավելությամբ հաղթել է Հենրիխ Մխիթարյանը: Ընդհանուր առմամբ, մարզասերները 29092 հաղորդագրություն են ուղարկել:
Դոլարի անկումը դադարեց, փոքր-ինչ թանկացել է նաեւ եվրոն: Դոլարի փոխարժեքը դեկտեմբերի 25-ին կազմել է 481 դրամ, եվրոյինը՝ 569, ռուբլունը՝ 8 դրամ 29 լումա, ֆունտինը՝ 643 դրամ:
Դեկտեմբերի 26-30-ը հանրապետությունում սպասվում է առանց տեղումների եղանակ: Օդի ջերմաստիճանն աստիճանաբար 4-5 աստիճանով կբարձրանա: Երեւանում նույնպես տեղումներ չեն սպասվում: Մայրաքաղաքում գիշերը կդիտվի -1+1, ցերեկը՝ +8+10 աստիճան տաքություն: