Սանտա Կլաուսը բաժանել է սուրբծննդյան նվերները եւ վերադարձել Հյուսիսային բեւեռ։ Այս մասին հաղորդում է ՏԱՍՍ-ը՝ վկայակոչելով Հյուսիսային Ամերիկայի օդատիեզերական պաշտպանության միավորված հրամանատարությունը։
«Սանտա Կլաուսի վերջին կանգառներից մեկը եղել է Հավայան կղզիները: Սուրբծննդյան գիշերը նա ամբողջ աշխարհում բաժանել է ավելի քան 7.2 միլիարդ նվեր»,-նշել են հրամանատարությունում:
Հյուսիսամերիկյան զինվորականները ամբողջ աշխարհում Սանտա Կլաուսի շարժին սկսել են հետեւել դեկտեմբերի 24-ին՝ Կանադայի արեւելյան ափի եւ ԱՄՆ ժամանակով 02:01-ին: Առաջին նվերները ստացել են Ավստրալիայի եւ Նոր Զելանդիայի բնակիչները, ապա Հյուսիսային Ամերիկայի օդատիեզերական պաշտպանության միավորված հրամանատարության ռադարը ֆիքսել է Ճապոնիայի, Մալազիայի, Չինաստանի, Հնդկաստանի, ինչպես նաեւ Աֆրիկայի, Մերձավոր Արեւելքի, Եվրոպայի, Լատինական Ամերիկայի եւ Հյուսիսային Ամերիկայի երկրներով հեքիաթային կերպարի թռիչքը: Կանադայի օդային տարածքում Ձմեռային Հրաշագործին ուղեկցում էին Կանադայի CF-18 տեսակի չորս օդային կործանիչներ։
Հյուսիսային Ամերիկայի օդատիեզերական պաշտպանության միավորված հրամանատարությունը, որը ներառում է նաեւ Կանադայի եւ ԱՄՆ-ի հակաօդային պաշտպանության եւ հակահրթիռային պաշտպանության համակարգերը, Սանտա Կլաուսի շարժին սկսել են հետեւել 1955 թվականից։ Դրա համար երկու երկրների հյուսիսային եւ արեւելյան շրջաններում գործի են դրվել 47 ռադարներ, ինչպես նաեւ ինֆրակարմիր հաղորդիչներով արբանյակներ:
