Թբիլիսիի Թանդոյանց Սուրբ Աստվածածին հայկական եկեղեցու հետ կապված հարցը Հայաստանի նախագահին է ներկայացվել ընդհանուր համատեքստում, սակայն այս հարցի կարգավորմամբ պետք է զբաղվի Վրաստանի հայ համայնքը: Այս մասին Թբիլիսիում լրագրողների հետ զրույցում ասել է Հայ առաքելական եկեղեցու վիրահայոց թեմի առաջնորդ Վազեն եպիսկոպոս Միրզախանյանը:
Նրա խոսքով՝ Վրաստանում հայկական ժառանգության հետ կապված խնդիրները պետք է լուծի հայ համայնքը եւ հասնի նրան, որ հայկական պատմական եւ մշակութային հուշարձաններին վնաս հասցնողները պատժվեն:
«Մեր դիրքորոշումը հետեւյալն է՝ մենք չենք ցանկանում, որ Սուրբ Էջմիածինը եւ Երեւանը զբաղվեն Վրաստանում հայկական մշակութային ժառանգության պահպանման հետ կապված խնդիրներով: Այս իրավիճակը կարող է միջպետական եւ միջեկեղեցական խնդիրների հանգեցնել: Հետեւաբար՝ այդ հարցով պետք է զբաղվի Վրաստանում հայ համայնքն ինքը»,- նշեց Միրզախանյանը:
Եպիսկոպոսը հայտնեց, որ եթե Թանդոյանց եկեղեցու հետ կապված հարցը մինչեւ ընթացիկ տարեվերջ չլուծվի, ապա հայ համայնքը Վրաստանի կառավարությանը դատի կտա, ինչպես նաեւ հարցի լուծմանը կներգրավի միջազգային կառույցներին:
Հիշեցնենք, որ 2017 թվականի հուլիսին Վրաստանի կառավարությունը Թբիլիսիում Թանդոյանց Սուրբ Աստվածածին եկեղեցին, որը կառուցվել է 19-րդ դարում, հանձնել է Վրաստանի Պատրիարքարանին:
Ավելի վաղ այս թեմայով Վրաստանի Տոլերանտության եւ բազմազանության ինստիտուտը հոդված էր պատրաստել, որում մասնավորապես նշված էր. «2017 թվականի հուլիսին Վրաստանի կառավարությունը Վրաց ուղղափառ եկեղեցուն է հանձնել վնասված եկեղեցի, որը գտնվում է Թբիլիսիում Աղմաշենեբելի 38 հասցեում, եւ նրան հարող տարածքը: Սակայն մինչեւ դա, պետությունը չի ուսումնասիրել տաճարի ծագումը եւ նրա մշակութային ու կրոնական նշանները, մինչդեռ Պատրիարքարանն արդեն եկեղեցում տարբեր տեսակի աշխատանքներ է իրականացնում»:
