Ռուսաստանից Հայաստան ներդրումներ իրականացվում են, սակայն դրանք դեռ աննշան են: Այս մասին դեկտեմբերի 26-ին լրագրողների հետ հանդիպման ժամանակ հայտարարել է «Ինտեգրացիա եւ զարգացում» հասարակական կազմակերպության նախագահ Արամ Սաֆարյանը:
Սակայն, ըստ նրա, Հայաստանն այժմ սպասելիքների փուլում է:
«Մենք ակնկալիքներ ունենք Ռուսաստանից նոր ներդրումների հետ կապված, որոնց համար, սակայն, համապատասխան որոշումներ դեռ չեն ընդունվել: Բայց դա չի նշանակում, որ ներդրումներ չկան: Դրանք կլինեն»,- վստահեցրել է Սաֆարյանը` հավելելով, որ հարցը ոչ թե ներդրումների մեջ է, այլ՝ դրանց ծավալների, եւ դա արդեն պայմանավորված է այն տնտեսական քաղաքականությամբ, որը կիրագործի Երեւանը:
Ինչպես նշել է ՀԿ-ի ղեկավարը, հայ ձեռնարկատերերը դեռ պետք է բացատրեն իրենց ռուս գործընկերներին, թե ինչպես է ստացվում, որ նման փոքր եւ աղքատ երկրից արտասահմանյան բանկերի հաշիվներին 1 միլիարդ դոլարի չափով գումարներ են փոխանցվում, եւ միեւենույն ժամանակ մի քանի հարյուր միլիոն դոլարի ներդրումներ են ակնկալում:
Արամ Սաֆարյանը նաեւ ընգծել է, որ կոռուպցիան եւս խոչընդոտում է Հայաստանի հետագա զարգացումը, եւ դրա դեմ պետք է պայքարել:
