Մենք մեր հարեւաններին ու դաշնակիցներին մշտապես վերաբերվում ենք որպես մարդկանց, ովքեր ունեն իրենց տեսակետները կյանքի եւ արտաքին քաղաքականության վերաբերյալ: Այս մասին «Կոմերսանտ»-ին տված հարցազրույցում հայտարարել է Ռուսաստանի փոխարտգորնախարար Գրիգորի Կարասինը՝ պատասխանելով հարցին, թե ինչպես է Ռուսաստանը վերաբերվում Հայաստանի Հանրապետություն-Եվրոպական Միություն համապարփակ եւ ընդլայնված գործընկերության համաձայնագրի ստորագրմանը:
«Մեր հարեւանները ինքնիշխան պետություններ են, սա վերաբերում է նաեւ ՀԱՊԿ-ի, ԵԱՏՄ-ի մեր դաշնակիցներին: Հասկանալի է, որ ժամանակակից դարաշրջանում նրանք զարգացնում են բազմավեկտոր շփումները. 21-րդ դարում դա բնական է: Մենք երբեք մեր հարեւաններին ու դաշնակիցներին ընտրության առջեւ չենք դրել: Բայց մենք իրավունք ունենք դաշնակցային հարաբերությունների գերակայություն ակնկալել: Բացի այդ, այլ ձեւաչափերում ստորագրվող համաձայնագրերը, այդ թվում նաեւ` Հայաստան-ԵՄ համաձայնագիրը, չպետք է խախտեն այն պարտավորությունները, որոնց շուրջ մենք արդեն համաձայնության ենք եկել», - ասել է նա: