Եթե Կատալոնիան իրավունք ունի անկախության հանրաքվե անցկացնել, ապա այլ սուբյեկտները եւս կարող են օգտվել այդ իրավունքից: Այս մասին դեկտեմբերի 27-ին լրագրողների հետ հանդիպման ժամանակ հայտարարել է Հայաստանի իշխող Հանրապետական կուսակցության պատգամավոր, «Եվրոպական ինտեգրացիա» հասարակական կազմակերպության ղեկավար Կարեն Բեքարյանը:
Վերջինիս խոսքով՝ եթե Կատալոնիայի նման շրջանը՝ իսպանական ժողովրդավարության բարձր մակարդակով, ազգամիջյան հարաբերությունների եվրոպական մակարդակով եւ լավ սոցիալ-տնտեսական ցուցանիշներով, չունենալով անվտանգության ապահովման խնդիր, կարողացել է բարձրացնել անկախության իրավունքի հարցը՝ հասցնելով այն միջազգային մակարդակի քննարկումների, ապա այլ չճանաչված շրջանները, օրինակ՝ Լեռնային Ղարաբաղը, ավելի շատ պատճառներ ունեն այս հարցը բարձրացնելու համար:
Ինչպես նշել է «Եվրոպական ինտեգրացիա» ՀԿ-ի նախագահը, Լեռնային Ղարաբաղի բնակիչների համար այս հարցը ուղղակիորեն կապված է նրանց հետագա ֆիզիկական գոյության խնդրի հետ, քանի որ նրանք կանգնած են հարեւան Ադրբեջանից բխող ֆիզիկական ոչնչացման մշտական սպառնալիքի առջեւ:
«Այս գիտակցմանը մեր գործընկերները մեզ համար ոչ այնքան ցանկալի տեմպերով, սակայն, այնուամենայնիվ, մոտենում են», - ասել է Կարեն Բեքարյանը՝ հավելելով, որ Հայաստանը պետք է ավելի ակտիվ քաղաքականություն վարի այս ուղղությամբ: