Հայաստանը չպետք է ներկա լիներ ՄԱԿ-ի Գլխավոր ասամբլեայում քվեարկությանը, որն ուղղված էր ԱՄՆ-ի՝ Երուսաղեմը Իսրայելի մայրաքաղաք ճանաչելու որոշման դեմ: Այս մասին դեկտեմբերի 28-ին լրագրողների հետ հանդիպման ժամանակ հայտարարել է Գլոբալիզացիայի եւ տարածաշրջանային հետազոտությունների վերլուծական կենտրոնի ղեկավար, քաղաքագետ Ստեփան Գրիգորյանը:
Փորձագետը նշել է, որ, մասնակցելով քվեարկությանը, Երեւանը մեծ սխալ է թույլ տվել: «Ես կարող եմ նշել հինգ երկիր, որոնք ոչ թե ձեռնպահ են մնացել, այլ ուղղակի չեն մասնակցել այդ քվեարկությանը: Դրանք են Վրաստանը, Ուկրաինան, Լեհաստանը, Չեխիան եւ Լատվիան»,-նշել է Գրիգորյանը` հավելելով, որ այդ երկրները ակտիվորեն աշխատում են ինչպես ԵՄ-ի, այնպես էլ ԱՄՆ-ի հետ՝ Հայաստանի նման որոշակի կախվածության մեջ գտնվելով դրանցից:
Բացի այդ, ինչպես նշել է քաղաքագետը, այդ հարցն այնքան բարդ եւ խճճված է, որ նույնիսկ այն կողմերը, որոնք ուղղակիորեն ներգրավված են եւ երկար տարիներ մասնակցում են հակամարտության կարգավորմանը, չեն կարող միշտ հասկանալ, թե ինչ է տեղի ունենում, եւ հաճախ փորձում են ավելի զսպված դիրքորոշում ունենալ: