Հետեւելով բազմաթիվ այլ երկրների օրինակին՝ Հունաստանն էլ է սկսելու զբոսաշրջիկներից հարկ գանձել 2018-ի հունվարի մեկից, հայտնում է Nat-geo-ն։ Այս մտադրությունը քննարկվում էր 2016-ից սկսած։
Օրինագիծը քննարկելիս՝ հունական տուրբիզնեսի ներկայացուցիչները կառավարությանը խնդրել են լրացուցիչ հարկը գանձել միայն ամենաթեժ զբոսաշրջային սեզոնին՝ հուլիսին ու օգոստոսին՝ պատճառաբանելով, որ նույնիսկ ամբողջ ծանրաբեռնվածությամբ աշխատելու դեպքում հյուրանոցների եկամուտն այնքան էլ մեծ չէ՝ տեղերի մեծ մասը զեղչերով է տրամադրվում։ Եթե հարկը ամբողջ տարվա ընթացքում գործի, Հունաստանի կուրորտները կկորցնեն իրենց մրցունակությունը։
Թվում էր, թե այս փաստարկներն ընդունվել էին։ Սակայն 2017-ի վերջին կառավարությունը վերադարձել է իր սկզբնական ծրագրին, հայտարարելով նոր հարկի մասին, որը գանձվելու է երկիր մտնելիս կամ մեկնելիս, հյուրանոցում կամ լիցենզավորված տներում իջեւանելու դեպքում՝ տուրի գնից առանձին։ Եթե զբոսաշրջիկը չցանկանա ենթարկվել նոր կանոնին՝ նրան կարող են տեղ չհատկացնել հյուրանոցում, նույնիսկ եթե նա ամբողջությամբ վճարել է դրա համար։
Ամենամեծ տուրիստական հարկը հինգաստղանի հյուրանոցների համար է գործելու՝ 4 եվրո մեկ գիշերվա համար։ 4 աստղանի հյուրանոցներում հարկը կլինի օրական 3 եվրոյի չափով, 3 աստղանիների համար՝ 1․50 եվրոյի չափով, իսկ 1 եւ 2 աստղանի հյուրանոցներում՝ 0․50 եվրոյի չափով։ Վարձով տներում հարկերը զգալիորեն ցածր են։ Չորս աստղանի տների դեպքում՝ օրական 1 եվրո։
Տուրօպերատորների հաշվարկներով՝ նոր հարկի պատճառով զբոսաշրջային տուրերը կթանկանան միջինը 40 եվրոյով։
Որոշ բարձրակարգ հյուրանոցներ արդեն պատրաստակամություն են իրենց հաշվին վճարել այդ հարկը՝ հույս ունենալով նոր պայմաններում պահպանել իրենց մրցունակությունը ։