Jalopnik առցանց պարբերականի տրամադրության տակ է հայտնվել Panasonic ընկերության անվարորդ մեքենայի առաջին լրտեսական լուսանկարը: Ենթադրվում է, որ նորույթը մի քանի օր անց ցուցադրության կհանվի Լաս Վեգասում CES ցուցահանդեսում, հայտնում է Autonews.ru-ն:
Panasonic-ն ակտիվորեն ներդրումներ է կատարում սեփական ավտոմոբիլային նախագծերի ստեղծման գործում: Ավելի վաղ հաղորդվել էր, որ ճապոնական ընկերությունը մինչեւ 2022 թվականը մեքենաների ոլորտում ներդրումները կկրկնապատկի՝ 1.3 տրիլիոն իենից հասցնելով 2.5 տրիլիոն իենի (շուրջ 11.6 մլրդ դոլարից մինչեւ 22.2 մլրդ դոլար):
2017 թվականի նոյեմբերին հայտնի էր դարձել, որ Panasonic-ն ավտոմատ կառավարման համակարգով մեքենաներ է թողարկել: Մեքենայի փորձարկումները՝ հնարավորինս մոտ իրական պայմաններին, մեկնարկել են Ճապոնիայից արեւմուտքում Ֆուկուի պրեֆեկտուրայի Էյհենձի տարածքի վեց կիլոմետրանոց ճանապարհահատվածում:
Մասնավորապես, ինժեներները փորձարկել են տեսախցիկների եւ սենսորների աշխատանքի արդյունավետությունը, որոնք որոշում են մեքենայի գտնվելու վայրը եւ վերահսկում շրջակա պայմանները: Բացի այդ՝ արհեստական ինտելեկտի վարքը փորձարկվել է երթեւեկի ժամանակ հնարավոր արտակարգ իրավիճակների հաղթահարման ունակության առումով:
