Արաբական երկրները մտադիր են ակտիվացնել դիվանագիտական ջանքերը, որպեսզի ՄԱԿ-ին համոզեն Պաղեստինը ճանաչել՝ Արեւելյան Երուսաղեմ մայրաքաղաքով: Այս մասին հայտարարել է Հորդանանի ԱԳ նախարար Այման Սաֆադին, փոխանցում է Reuters-ը:
Նախօրեին Ամմանում տեղի է ունեցել 6 արաբական երկրների ԱԳ նախարարների հանդիպում՝ քննարկելու համար նախկինում Արաբական պետությունների լիգայի ընդունած որոշումների իրականացման ընթացքը՝ ի պատասխան Երուսաղեմը Իսրայելի մայրաքաղաք ճանաչելու մասին ԱՄՆ նախագահի որոշմանը:
Կոմիտեն, որի մեջ են մտնում Եգիպտոսը, Մարոկկոն, Սաուդյան Արաբիան, ԱՄԷ-ն, Պաղեստինը եւ Հորդանանը, ստեղծվել է Դոնալդ Թրամփի որոշումից կարճ ժամանակ անց Կահիրեում տեղի ունեցած ԱՊԼ արտահերթ նիստից հետո:
ԱՊԼ-ն կարծում է, որ Թրամփի քայլը բռնություն է հրահրում ամբողջ տարածաշրջանում, եւ Թրամփի հայտարարությունը «միջազգային իրավունքի վտանգավոր խախտում» է համարում, որն իրավաբանական ուժ չունի:
Սաֆադիի խոսքով՝ նախրարները մտադիր են այս ամսվա վերջին ԱՊԼ գագաթնաժողովի ժամանակ քայլերի շարք առաջարկել: «Մենք այդ որոշմանը կհակազդենք ՄԱԿ-ում Պաղեստինի պետությունը 1967 թվականի սահմաններով, որպես նրա մայրաքաղաք Արեւելյան Երուսաղեմով ճանաչելու մասին բանաձեւի ընդունման միջոցով»,- ասել է Սաֆադին:
