Վարչապետ Կարեն Կարապետյանը Սուրբ ծնունդի առիթով շնորհավորական ուղերձ է հղել Վրաստանի վարչապետ Գեորգի Կվիրիկաշվիլիին եւ Ռուսաստանի վարչապետ Դմիտրի Մեդվեդեւին:
Հայաստանի կառավարության լրատվական վարչության տեղեկացմամբ՝ Գեորգի Կվիրիկաշվիլիին հղած ուղերձում մասնավորապես ասվում է. «Վստահ եմ, որ համատեղ ջանքերի շնորհիվ մեզ կհաջողվի ամրապնդել հայ-վրացական դարավոր բարեկամական հարաբերությունների դինամիկ զարգացումը՝ երկուստեք հետաքրքրություն ներկայացնող ոլորտներում մեր փոխգործակցությունը բարձրացնելով որակական նոր մակարդակի»:
Դմիտրի Մեդվեդեւին հղած ուղերձում էլ վարչապետը նշել է. «Համոզված եմ, որ համատեղ ջանքերով մենք կշարունակենք մեր ներդաշնակ փոխգործակցությունը ինչպես երկկողմ ձեւաչափով, այնպես էլ՝ բազմակողմ եւ ինտեգրացիոն միավորումների շրջանակներում՝ ի շահ մեր ժողովուրդների եւ երկրների զարգացման ու բարօրության»:
