Եգիպտոս հանգստանալ մեկնելու փոխարեն մի քանի ընտանիք Ամանորը դիմավորել է «Զվարթնոց» օդանավակայանում, երբ պարզել է, որ իրենք խաբեության զոհ են դարձել:
NEWS.am-ի հետ զրույցում զբոսաշրջիկներից Լիլիթ Վարդանյանը պատմեց, որ իր եւ եղբոր ընտանիքներն Ամանորյա փաթեթներն ամրագրել է դեռեւս օգոստոսին «Պրոգրեսսիվ թրավելի» միջոցով:
«Երկու ընտանիքի համար մենք 7 հազար դոլար ենք տվել: Դեկտեմբերի 31-ին առավոտյան մեկ այլ տուրիստական ընկերությունից մեզ զանգեցին եւ ասացին, որ «Պրոգրեսսիվ թրավելից» մեզ կեղծ թղթեր են տվել, որոնցով չենք կարողանա մեկնել Եգիպտոս: Մենք զանգեցինք տնօրենին, նա էլ վստահեցրեց, թե թռնելու եք, անպայման գնացեք օդանավակայան, մենք գնացինք, ամբողջ գիշերն անցկացրինք այնտեղ, բայց չկարողացանք մեկնել, որովհետեւ կեղծ թղթեր էին մեզ տվել, մեր անունները ոչ մի տեղ չկար: Միայն այդ օրը 22 ընտանիք չկարողացավ մեկնել»,- պատմեց Լիլիթ Վարդանյանը:
Խաբված ընտանիքներն արդեն դիմել են իրավապահ մարմիններին եւ հաղորդում ներկայացրել: «Պրոգրեսսիվ թրավել» ընկերության տնօրեն Ռոզիտա Պապովան մեզ հետ զրույցում, սակայն, պնդեց, որ իրականում ինքն է խաբեության զոհ դարձել. «Մենք արդեն փաստաթղթերն ենք պատրաստել, որ դիմենք դատարան, վճարման անդորրագրերն ունենք: Մենք ենք խաբեության զոհ դարձել, քանի որ դիմել էինք երրորդ կողմի, որն էլ յուրացրել է գումարներն ու տոմսերը վերավաճառել: «Պրոգրեսսիվ թրավելը» բարձր ռեյտինգով տուրիստական կազմակերպություն է, մեծ գումարներ եմ վստահել եւ քաշվել եմ: Այն ընկերությունը, որին ես դիմել էի, 2 տարի է՝ ինչ գործում է, բոլոր վճարումներն արել ենք, անդորրագրերն ունենք, դրա համար էլ ես դեկտեմբերի 31-ին բոլորին ասել եմ՝ գնացեք հանգիստ եւ թռեք: Էդքանից հետո այդ ընկերությունը տոմսերի մի մասը վերավաճառել է մեր հաճախորդներին»:
Ընկերության տնօրենը նշեց նաեւ, որ 6 ընտանիք է եղել:
