Արցախում շփման գծում հունվարի 7-ին զոհված 19-ամյա Վաչե Չիլինգարյանը հակառակորդի դիպուկահարի կրակոցի արդյունքում է զոհվել: Այս մասին այսօր՝ հունվարի 8-ին, լրագրողների հետ զրույցում ասաց ՀՀ զինված ուժերի գլխավոր շտաբի պետ, գեներալ-գնդապետ Մովսես Հակոբյանը:
Նա նշեց, որ ժամկետային զինծառայողը ոչ մի խախտում թույլ չի տվել եւ դիպուկահարի կրակոցի արդյունքում է մահացել: Մովսես Հակոբյանի խոսքով, կա նաեւ երկու վիրավոր, որոնք թեթեւ մարմնական վնասվածքներ են ստացել, վիճակները բավարար է: նա նշեց, որ հրամանատարը գնացել է զինծառայողին օգնություն ցուցաբերելու, բայց վիրավորվել է: Մեկ այլ զինծառայող էլ վիրավորում է ստացել մեքենայում՝ դեպքի վայր շտապելիս հայտնվելով կրակի տակ:
«Ուզում եմ առանձնացնել սպայի սխրագործությունը, որ մեկ վայրկյան չի մտածել, նետվել է իր զինվորի կյանքը փրկելու համար, բայց նորից փաստեմ, որ այդ զինվորը որեւէ խախտում չի արել: Հակառակորդը անընդհատ ձեւեր, մեթոդներ է փնտրում մեր զինծառայողներին խոցելու»,-ասաց Հակոբյանը՝ հավելելով, որ այս պահին շփման գծում իրավիճակը հանգիստ է:
Ավելի վաղ Արցախի պաշտպանության բանակի մամուլի ծառայությունը հայտնել էր, որ հունվարի 7-ին ժամը 13:20-ի սահմաններում, ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասում հակառակորդի կողմից արձակված կրակոցից մահացու վիրավորում է ստացել ՊԲ զինծառայող, 19-ամյա Վաչե Չիլինգարյանը:
