Հրեա ուսանողների համաշխարհային միությունը (WUJS) Իսրայելում անցկացված 44-րդ Համաշխարհային կոնգրեսում պաշտոնապես ճանաչել է Հայոց ցեղասպանությունը:
Հիմնական զեկուցողներից մեկը, որն աջակցել է բանաձեւին, հրեական ծագմամբ ավստրալացի փաստաբան Արիել Զոհարն է, հայտնում է Ավստրալիայի Հայ ազգային կոմիտեն:
Ավստրալիայի Հայ ազգային կոմիտեի գործադիր տնօրեն Հայկ Կայսերյանը շնորհակալություն է հայտնել WUJS-ին մարդու իրավունքների վերաբերյալ այս կարեւոր հայտարարության համար: «Մենք շնորհակալություն ենք հայտնում Արիել Զոհարին եւ Հրեա ուսանողների համաշխարհային միության նրա գործընկերներին բանաձեւի ընդունման համար, որը ոչ միայն Օսմանյան Թուրքիայում հայերի, հույների եւ ասորիների դեմ իրագործված ցեղասպանությունն է ճանաչում, այլեւ դատապարտում է եւ մերժում ցեղասպանության պատմական իրողության ժխտման, խեղաթյուրման կամ անտեսելու ցանկացած փորձ»,- հայտարարել է Կայսերյանը:
Նրա խոսքով՝ այս կազմակերպության կողմից Հայոց ցեղասպանության ճանաչումը Իսրայելի կառավարությանը եւ այլ երկրներին, ինչպիսին Ավստրալիան է, հզոր մեսիջ է. այն ցույց է տալիս, որ մարդու իրավունքները հանուն դիվանագիտական շահի չպետք է բանակցությունների առարկա լինեն՝ անկախ հանգամանքներից: