Կիրակի ամերիկյան SpaceX ընկերության Falcon 9 տանող հրթիռով արձակված ԱՄՆ գաղտնի արբանյակը, որը Zuma ծածկագրաին նշում ուներ, չի հասել հաշվարկված ուղեծրին եւ կործանվել է օվկիանոս ընկնելիս, հայտնում է Reuters-ը՝ վկայակոչելով
ԱՄՆ պաշտոնատար անձանց տեղեկատվությունը, որոնք ճեպազրույցի ժամանակ իրազեկվել են անհաջող արձակման մասին: Zuma-ն չի կարողացել ժամանակին անջատվել տանող հրթիռի երկրորդ աստիճանից եւ կա՛մ տիեզերքում է կործանվել՝ չհասնելով հաշվարկված ուղեծրին, կա՛մ կործանվել է օվիկանոսն ընկնելիս: ԱՄՆ զինված ուժերը ելնում են այն հանգամանքից, որ արբանյակը «հաշվեկշռից դուրս է գրվել»:
Reuters-ի աղբյուրների տեղեկություններով՝ սկսվել է տեղի ունեցածի հետաքննություն: Նախնական տվյալները ցույց են տալիս, որ արբանյակը չի կորել ինչ-որ մեկի դիվերսիայի կամ չարամտության հետեւանքով: SpaceX-ում հրաժարվել են տեղի ունեցածը մեկնաբանել: «Մենք նման կարգի առաքելությունները չենք մեկնաբանում: Սակայն տվյալների վերլուծությունը ցույց է տալիս, որ Falcon 9-ը նորմալ է գործել»,- հայտարարել է ընկերության պաշտոնական ներկայացուցիչ Ջեյմս Գլիսոնը:
Ավելի վաղ հաղորդվել էր, որ հրթիռն արձակվել է Ֆլորիդա նահանգի Կանավերալ հրվարդանի ԱՄՆ ՌՕՈՒ բազայից կիրակի, տեղական ժամանակով մոտ 20:00-ին: Նախապես մեկնարկը ծրագրված էր 2017-ի նոյեմբերին, սակայն տեխնիկական պատճառներով հետաձգվել էր հունվարի 5-ին: Այնուհետեւ կրկին հետաձգվել էր օդերեւութաբանական վատ պայմանների պատճառով:
Արբանյակի նշանակության մասին տեղեկություններ չեն հրապարակվում, ինչպես լինում է տիեզերք դուրս բերվող գաղտնի սարքերի դեպքում: SpaceX-ին որպես հրթիռի արձակող եւ արտադրող ընտրել էր ԱՄՆ պաշտպանության նախարարության Northrop Grumman կապալառու ընկերությունը:
SpaceX-ը ծրագրում է 2018-ին ընդամենը մոտ 30 արձակում իրականացնել: 2017-ին այս ընկերության հրթիռները տիեզերք են ուղարկվել 18 անգամ:
