Եվրոպան Թուրքիային չէր ֆինանսավորում այնքան, որքան Անկարան ակնկալում էր: Եվ դա նույնպես չէր կարող չազդել հարաբերությունների վրա: Այս մասին NEWS.am-ի թղթակցի հետ զրույցում հայտարարել է Ռուսաստանի Քաղաքական եւ ռազմական վերլուծության ինստիտուտի ռազմական կանխատեսման կենտրոնի ղեկավար Անատոլի Ցիգանոկը՝ պատասխանելով այն հարցին, թե Եվրամիությունը կարող է ինչ-որ կերպ ազդել Թուրքիայի վրա, քանի որ վերջինս ավելի շատ է հեռացել ժողովրդավարական սկզբունքներից եւ վերջնականապես վերածվել ավտորիտար պետության։

Նրա խոսքով՝ Եվրամիությունն Անկարային 20 տարի շարունակ խոստացել է, որ Թուրքիան կդառնա ԵՄ անդամ, եթե կատարի մի շարք պայմաններ: Սակայն այդ պայմանները ամեն տարի ավելացել էին: «Եվ նույնիսկ այն փաստը, որ Թուրքիան օգնել է միգրանտներին եւ ճանապարհ բացել դեպի Եվրոպա, դարձել էր կարեւոր խնդիր»,-ավելացրել է Ցիգանոկը՝ հիշեցնելով, որ Էրդողանը բավական դաժանորեն ճնշեց ռազմական հեղաշրջման փորձը: Սա, փորձագետի կարծիքով, վերջիվերջո հանգեցրել է Թուրքիայի դանդաղ հեռացմանը ՆԱՏՕ-ից, ինչի վկայությունն է Ս-400 նորահույն ռուսական հակաօդային պաշտպանության համակարգերի ձեռքբերման  մասին որոշումը:

Միեւնույն ժամանակ, ռազմական փորձագետը նշել է,  որ ԱՄՆ-ն դեռեւս մեկ տարի առաջ էր կազմակերպել  Թուրքիայում տեղակայված «Ինջիրլիք» ամերիկյան ռազմակայանում պահվող իր միջուկային զինամթերքի հեռացումը: Սա, փորձագետի կարծիքով, վկայում է այն մասին, որ ԱՄՆ-ն Թուրքիայի հետ համագործակցության հույս չի կապում:

Անատոլի Ցիգանոկը համոզմունք  է  հայտնել, որ նման իրավիճակում Թուրքիան հազիվ թե ցանկանա  միանալ Եվրամիությանը: Նա ընդգծել է, որ Անկարայի եւ ՆԱՏՕ-ի հարաբերություններում  առաջացած ճեղքերը ժամանակի հետ ավելի կխորանան։