Ներկայացուցիչների պալատի արտաքին հարցերով կոմիտեի նախագահ եւ ԱՄՆ Կոնգրեսի հայերի վաղեմի բարեկամ Էդ Ռոյսը հայտարարել է այս տարի ընտրություններին չմասնակցելու մտադրության մասին։
1992 թվականին Կոնգրեսում ընտրվելուց հետո Էդ Ռոյսը ներկայացրել է Օրանժ օկրուգը, որտեղ ապրում է մեծ հայկական համայնք։
Իր պաշտոնավարման ժամանակ կոնգրեսական Ռոյսը կողմ է հանդես եկել ԱՄՆ կառավարության կողմից ցեղասպանության ճանաչմանը, Արցախի ժողովրդի ինքնորոշմանը եւ Հայաստանի ու ԱՄՆ-ի միջեւ առեւտրային եւ ներդրումային կապերի զարգացմանը։
«Հայկական ծագում ունեցող ամերիկացիները բարձր են գնահատում Ներկայացուցիչների պալատի արտաքին հարցերով կոմիտեի նախագահի եւ Արցախի խաղաղ կարգավորման առաջարկներից մեկի հեղինակի ջանքերը»,-նշված է Ամերիկայում հայկական ազգային կոմիտեի ֆեյսբուքյան հայտարարության մեջ։
