Ճապոնական Toyota Motor եւ Mazda Motor ավտոարտադրողները նախատեսում են համատեղ ներդրում կատարել Ալաբամա նահանգի Հանթսվիլ քաղաքում 1,6 մլրդ արժողությամբ գործարան կառուցելու համար, հաղորդում է The Wall Street Journal-ը։
Համատեղ գործարան կառուցելու որոշումը հայտարարվել էր օգոստոսին, սակայն թե որտեղ էր այն գտնվելու, չէր հաղորդվել։
Սպասվում է, որ 2021 թվականին նախատեսված գործարանի բացումը կստեղծի 4 հազար նոր աշխատատեղ։ Ձեռնարկությունը տարեկան կթողարկի շուրջ 300 հազար մեքենա՝ մեծամասամբ Toyota Corolla եւ Mazda քրոսովերներ։
Նշվում է, որ Ալաբամայում գործում են մեքենաների արտադրության երեք այլ գործարաններ, որոնք պատկանում են գերմանական Daimler-ին, ճապոնական Honda-ին եւ հարավկորեական Hyundai-ին։ Daimler-ը սեպտեմբերին հայտարարել էր այս նահանգում գտնվող իր գործարանի հզորության ընդլայնման համար լրացուցիչ 1 մլրդ դոլար ներդնելու պլանների մասին։
Բացի այդ, Հենթսվիլում է գտնվում աշխարհում ամենամեծ Toyota-ի շարժիչներ արտադրող գործարանը։ 2016 թվականին այն թողարկել է ավելի քան 702 հազար շարժիչ։
Mazda-ի բաժնետոմսերը չորեքշաբթի թանկացել են 0,7 տոկոսով, Toyota-ի արժեթղթերի գները աճել են 2,2 տոկոսով։