Մարդիկ դադարել են մեծ ուշադրություն դարձնել ամանորյա սեղանի շքեղությանը եւ փորձում են խուսափել անիմաստ ծախսերից: Այս մասին հունվարի 10-ին լրագրողների հետ հանդիպման ժամանակ ասաց ՀՀ առողջապահության նախարարության Ֆիզիկական բժշկության եւ կուրորտաբանության գիտահետազոտական ինստիտուտի բժիշկ-դիետոլոգ Վարդանուշ Պետրոսյանը:
Սակայն, դիետոլոգի կարծիքով, դա մեծապես պայմանավորված է երկրում տիրող սոցիալ-տնտեսական դժվարին իրավիճակով: «Ոչ բոլորը կարող են իրենց շքեղ ամանորյա սեղան թույլ տալ: Բայց եթե ցանկությունը շատ մեծ է, ես գիտեմ դեպքեր, երբ ոմանք գնում են բանկ եւ հատուկ վարկ են վերցնում դրա համար», - ասաց Պետրոսյանը:
Ինչ վերաբերում է տոնական օրերին հաճախակիացող մարսողական խնդիրներին, դիետոլոգը նշեց, որ, որպես կանոն, այդ խնդիրները ծագում են ժամկետանց սննդի, վատ որակի ալկոհոլի օգտագործման, ինչպես նաեւ կերակրատեսակների եւ նախուտեստների ոչ պատշաճ համադրության հետեւանքով: Ալկոհոլային խմիչքներից եւ ճարպային սննդից օրգանիզմը ջրազրկվում է: Այդպիսի դեպքերում պետք է ավելի շատ ջուր խմել, քան՝ շաքարավազի բարձր պարունակությամբ գազավորված ըմպելիքներ: