News
Լրահոս
News
Ուրբաթ
Մարտ 29
Տեսնել լրահոսը

Մարդու իրավունքների պաշտպանի որոշմամբ, հունվարի 10-ի երեկոյան, հոգեբանից, բժշկից եւ իրավաբանից կազմված աշխատանքային խումբը չհայտարարված այց է կատարել «Նուբարաշեն» քրեակատարողական հիմնարկ՝ տեսակցելու «Սանսա ծռեր» խմբի անդամներ Արայիկ Խանդոյանին, Արմեն Բիլյանին եւ Սմբատ Բարսեղյանին։

ՄԻՊ-ից NEWS.am-ին հայտնում են, որ այցի ընթացքում առաձնազրույցներից բացի, հերթական անգամ ուսումնասիրվել են նրանց պահման պայմաններն ու բժշկական փաստաթղթերը:

Առանձնազրույցի ընթացքում Արմեն Բիլյանը տեղեկացրել է, որ ունի գլխացավեր եւ գլխապտույտ: Նրա վերաբերյալ բժշկական փաստաթղթերի ուսումնասիրությունից պարզվել է, որ հացադուլի ընթացքում 2017 թվականի դեկտեմբերի 21-ին եւ 2018 թվականի հունվարի 9-ին զննվել է բժշկական աշխատանքային հանձնաժողովի կողմից, նշանակվել է դեղորայքային բուժում: Արմեն Բիլյանը, սակայն, դեղերը չի ընդունում՝ հացադուլում գտնվելու պատճառով:

Հացադուլում գտնվելու ընթացքում Արմեն Բիլյանին մի քանի անգամ այցելել է հոգեբան: Այցի ընթացքում պարզվել է, որ նրան առաջարկվել է տեղափոխվել «Դատապարտյալների հիվանդանոց» քրեակատարողական հիմնարկ, սակայն նա հրաժարվել է՝ պնդելով, որ ցանկանում է տեղափոխվել միայն «Արմավիր» քրեակատարողական հիմնարկ:

Արմեն Բիլյանի վերաբերյալ փաստաթղթերի ուսումնասիրության, նրա հետ առանձնազրույցի արդյունքների հիման վրա Մարդու իրավունքների պաշտպանի աշխատակազմն արձանագրում է, որ Արմեն Բիլյանն ունի հոգեբանական հետեւողական աջակցության կարիք: Բացի այդ, երկարատեւ հացադուլի վնասակար հետեւանքներից խուսափելու համար նա ունի մշտական բժշկական հսկողության կարիք:

Սմբատ Բարսեղյանի հետ առանձնազրույցի ընթացքում վերջինս տեղեկացրել է, որ հացադուլով  պայմանավորված ունի ընդհանուր թուլություն, ցածր ճնշում: Այնուամենայնիվ, առողջական խնդիրների կապակցությամբ Սմբատ Բարսեղյանն այլ բողոք կամ պահանջ չի ներկայացրել՝ նույնպես նշելով, որ իր խնդիրն «Արմավիր» քրեակատարողական հիմնարկ տեղափոխվելն է: 2018 թվականի հունվարի 9-ին Սմբատ Բարսեղյանը զննվել է բժշկական աշխատանքային հանձնաժողովի կողմից:

Արայիկ Խանդոյանի հետ կապված պարզվել է, որ երիկամների ցավի հետ կապված Մարդու իրավունքների պաշտպանի աշխատակազմի բարձրացրած հարցի հիման վրա հունվարի 10-ին նա ենթարկվել է սոնոգրաֆիկ հետազոտություն:

Մարդու իրավունքների պաշտպանի աշխատակազմի եւ Արդարադատության նախարարության քրեակատարողական վարչության համատեղ աշխատանքի հիման վրա այսօր Արայիկ Խանդոյանին նախատեսված է նաեւ ուռոլոգի այցելություն: Նախատեսված են նաեւ մի շարք լրացուցիչ հետազոտություններ: Մանրամասները կներկայացվեն Արայիկ Խանդոյանին եւ նրա փաստաբանին:

Բանավոր ընաթացակարգով աշխատանքից զատ, Պաշտպանի աշխատակազմում նախաձեռնված է նաեւ գրավոր ընթացակարգ: Մասնավորապես, Արդադարադատության նախարարության քրեակատարողական վարչություն են ուղարկված համապատասխան գրություններ:

Մարդու իրավունքների պաշտպանի աշխատակազմը մշտական կապի մեջ է նաեւ Արայիկ Խանդոյանի, Արմեն Բիլյանի եւ Սմբատ Բարսեղյանի փաստաբանների հետ:

!
Այս նյութը հասանելի է նաև   Русский
Տպել
Ամենաշատ