ԱՄՆ-ի Նյու Ջերսի նահանգում գտնվող «Գորգիաս Պրես» ակադեմիական հրատարակչությունը, որն առաջատարն է երկրում արեւելագիտական գրականության հրատարակման բնագավառում, լույս է ընծայել ԵՊՀ արեւելագիտության ֆակուլտետի դասախոս, բանասիրական գիտությունների թեկնածու Արման Հակոբյանի «Արամեագիտության եւ ասորագիտության ներածություն» դասագրքի անգլերեն թարգմանությունը:
Դասագիրքը հայերեն լույս է տեսել Երեւանում 2015 թվականին եւ առաջացրել արտասահմանյան մասնագետների մեծ հետաքրքրությունը, ինչը եւ պայմանավորել է գրքի անգլերեն թարգմանության անհրաժեշտությունը:
Մոտ 600 էջ հաշվող աշխատությունը պարունակում է արամեացիների եւ ասորիների պատմության, լեզվի, հոգեւոր եւ նյութական մշակույթի, կրոնական կյանքի, այսօրվա հիմնախնդիրների համապարփակ նկարագիրը:
Ա. Հակոբյանը Հայաստանում եբրայագիտության եւ ասորագիտության հիմնադիրն է: 2003 թվականին լույս է տեսել նրա «Արդի եբրայերեն», իսկ 2005 թվականին՝ «Դասական ասորերեն» դասագիրքը: Վերջինը 2010 թվականին ռուսերեն թարգմանությամբ հրատարակել է Ռուսաստանի խոշորագույն՝ «ԱՍՏ-Պրես» հրատարակչությունը. դա ասորերենի ռուսալեզու միակ դասագիրքն է:
