Կառավարության այս տարվա առաջին նիստը, մեղմ ասած, տխուր եւ ձանձրալի է անցել: Կարեն Կարապետյանի որոշումը՝ Ամանորի տոներին հանգստյան օրերը կրճատելու մասին, կարծես վերաբերում է բոլորին՝ իրենից բացի: Վարչապետը մինչեւ հունվարի 12-ն արձակուրդում է լինելու: Այսօր նրա փոխարեն նիստը վարել է փոխվարչապետ Վաչե Գաբրիելյանը:

Առանց ավանդական հանձնարարականների, սուր դիտողությունների եւ լակոնիկ հարց ու պատասխանի. կարելի է ասել՝ Վաչե Գաբրիելյանը նիստն անցկացրել է առանց «դրայվի»:

Այսօրվա կարեւորագույն որոշումն աջակողմյան ղեկով մեքենաների մասին էր: Տրանսպորտի նախարարը ներկայացրել է նախագիծը, որից պարզ է դառնում. իշխանությունները զիջումների են գնացել: Չնայած ապրիլի 1-ից աջ ղեկով մեքենաների ներմուծումն ու գրանցումն արգելվելու է, դա չի տարածվում մինչ այդ գնված մեքենաների վրա: Վահան Մարտիրոսյանի խոսքը, սակայն, համոզիչ չի հնչել, փոխվարչապետը ճշտող հարց է տվել:

Մյուս հետաքրքիր որոշումը քաղաքապետ Տարոն Մարգարյանն է ներկայացրել: Հայաստանը խստացնում է տուգանքները հրավառության կանոնների խախտման համար: Ֆիզիկական եւ իրավաբանական անձինք հրավառության կանոնների խախտման առաջին դեպքի համար կվճարեն 1 մլն, երկրորդի համար՝ 2 մլն դրամի չափով տուգանք: Արգելվում է նաեւ հրավառությունը բնակելի շենքերի անմիջական հարեւանությամբ եւ ոչ սահմանված ժամին:

Կառավարությունն այսօր նաեւ առանց մրցույթի, վարձակալության իրավունքով տարածք է տրամադրել նախկին պատգամավոր Գարեգին Նուշիկյանին պատկանող «Պարկ գրուպին»: Ըստ նախագծի՝ Երեւանի Մոնթե Մելքոնյան փողոցին հարակից տարածքում լինելու է տարածաշրջանում նմանը չունեցող մանկական, երիտասարդական, ընտանեկան հանգստի, ժամանցի եւ զվարճանքի կենտրոն: Ծրագրի համար Նուշիկյանը կծախսի 22 մլն դոլար: Կառավարության նիստից հետո Երեւանի քաղաքապետը լրագրողներին պատմել է, որ այնտեղ ջրային միջավայր է լինելու, շատրվաններ, այն եվրոպական չափանիշներին համապաստախանող լավագույն հանգստի գոտին է լինելու:

Նիստի ընթացքում որեւէ անդրադարձ վերջին օրերի թանկացումներին չի եղել: Լրագրողները նիստից հետո կառավարության անդամներին հարցրել են գնաճի մասին: Դիզվառելիքի թանկացմանը Վահան Մարտիրոսյանը նախ չի ցանկացել անդրադառնալ, ապա «ուրախացրել է» ներկաներին. տրանսպորտը մի քանի ուղղություններով կթանկանա:

Գյուղատնտեսության փոխնախարար Ռոբերտ Մակարյանն էլ շտապել է «մխիթարել»: 

Էդուարդո Էռնեկյանը հեռանում է բիզնեսից. ժառանգորդն արդեն հայտնի է: Արգենտինաբնակ գործարարն ամերիկյան պարբերականներից մեկին տված հարցազրույցում հայտնել է, որ իր բիզնեսն այսուհետ կկառավարի զարմիկը՝ Մարտին Էռնեկյանը: 85-ամյա գործարարը նշել է, որ ինքն էլ անգործ չի մնա. բիզնեսի նոր ուղղություններ է ուսումնասիրելու:

Երեւանում հունվարի 8-ին 2 ոստիկանի մահվան ելքով վթարի գործով այսօր կալանավորվել է «Ճվճվ Արոյի» որդին՝ «Սաքուլիկ» մականունով հայտնի Սարգիս Վարդանյանը: Վթարը կարծես կռվախնձոր է դարձել իրավապահ մարմինների միջեւ: «Ճվճվ Արոյի» որդիներն առաջին անգամ չէ, որ նման պատմության մեջ են հայտնվում, սակայն նախկինում նրանց նկատմամբ մշտապես «ներողամիտ են եղել»: Շատերի կարծիքով՝ վերջին ողբերգական պատահարը հենց անպատժելիության հետեւանք էր: Ի պատասխան հնչող մեղադրանքների՝ Հայաստանի փոխոստիկանապետ Հունան Պողոսյանը «Ազատության»-ն ասել է, որ «ոստիկանությունը մշտապես պատժել է այդ վիժվանքներին», իսկ այլ համակարգերի գործունեության մասով նման պնդումներ չի հնչեցրել, խուսափել է գնահատական տալ: Լրագրողներն այսօր նախկին գլխավոր դատախազ Գեւորգ Կոստանյանից հետաքրքրվել են՝ արդյո՞ք սրանով Պողոսյանն ակնարկում է, որ անպատժելիությունը բխում է քննչական մարմիններից:

Ի դեպ, կալանքի տակ է նաեւ «Ճվճվ Արոյի» մյուս որդին՝ Սերժ Վարդանյանը: Նա մի քանի ամիս է՝ մեղադրյալի կարգավիճակ ուներ, սակայն հայտնաբերվել եւ կալանավորվել է վթարից հետո միայն: Ոստիկանությունը նույնիսկ տեսանյութ է հրապարակել, թե ինչպես են հյուրանոցից բերման ենթարկում Սերժ Վարդանյանին:

Նաիրիտ գործարանում օգոստոսի 28-ին բռկնված խոշոր հրդեհի պատճառը հայտնի է. այն աշխատակիցների կողմից դյուրավառ նյութերի պահպանման կանոնները խախտելու հետեւանք էր: Չնայած սրան՝ քրեական գործը կարճվել է: Գլխավոր դատախազությունն այսօր հայտնել է, որ գործը կարճվել է, քանի որ հրդեհը ծանր հետեւանքների չի հանգեցրել: Միաժամանակ, նախաքննությամբ հիմնավորվել է նշված աշխատակիցների կողմից իրենց պարտականությունները ոչ պատշաճ կատարելու հանգամանքը: Հենց այս խնդրով էլ Երեւանի դատախազը դիմել է նախարարներ Դավիթ Տոնոյանին եւ Աշոտ Մանուկյանին՝ թերությունները վերացնելու եւ հետագայում նման դեպքերը բացառելու ուղղությամբ քայլեր ձեռնարկելու համար:

Դանիայում Հայաստանի դեսպան Ալեքսանդր Արզումանյանը ՄԻԵԴ-ում հաղթել է Հայաստանին: Նախկին արտգործնախարարը հայց էր ներկայացրել ՄԻԵԴ՝ նշելով, որ 2007 թվականի մայիսից սեպտեմբեր իրեն անօրինական կալանքի տակ են պահել: Մարդու իրավունքների եվրոպական դատարանի որոշմամբ՝ Հայաստանը 2 հազար եվրո կվճարի Արզումանյանին, ինչպես նաեւ կփոխհատուցի դատական ծախսերը:

Քիմ Քարդաշյանը պոռնո ֆիլմերի հանրահայտ կայքի 2017 թվականի վարկանիշի առաջատարներից է: Կայքի տվյալների համաձայն՝ հայազգի աստղը զբաղեցնում է չորրորդ հորիզոնականը: Եվս մեկ հետաքրքիր վիճակագրություն. Քիմի մասնակցությամբ տեսագրություն որոնողների մեծ մասը կանայք են եղել:

Դոլարը շարունակում է էժանանալ, եվրոյի փոխարժեքը կայուն է: Հունվարի 11-ին դոլարի փոխարժեքը կազմել է 484 դրամ, եվրոյինը՝ 578, ռուբլունը՝ 8 դրամ 50 լումա, ֆունտինը՝ 653 դրամ:

Հունվարի 12-ի գիշերը հանրապետության շրջանների զգալի մասում տեղումներ են սպասվում: Օդի ջերմաստիճանը կբարձրանա 3-4 աստիճանով: Երեւանում վաղը գիշերը տեղումներ կլինեն, գիշերային ժամերին՝ թաց ձյան տեսքով: Մայրաքաղաքում գիշերը կդիտվի 0-2, ցերեկը՝ +10+12 աստիճան տաքություն: