Մեքսիկայի էկոնոմիկայի նախարար Իլդեֆոնսո Գուախարդոն հերքել է ԱՄՆ նախագահ Դոնալդ Թրամփի հայտարարությունը երկու երկրների սահմանին պատի կառուցման համար վճարելու մասին, հաղորդում է «ՌԻԱ Նովոստի»-ն։
«Մեքսիկայի նախագահ Էնրիկե Պենյա Նետոն շատ պարզ ձեւակերպել է՝ Մեքսիկան երբեք չի վճարի այս պատի համար»,-գրել է Գուախարդոն թվիթերյան իր միկրոբլոգում:
Ավելի վաղ Թրամփը Wall Street Journal-ին տված հարցազրույցում ասել էր, որ Մեքսիկան կարող է վճարել ԱՄՆ-ի հետ սահմանին պատի կառուցման համար անուղղակիորեն` նոր NAFTA (Հյուսիսամերիկյան ազատ առեւտրի գոտի) պայմանագրի միջոցով:
Թրամփը կարգադրել էր Մեքսիկայի հետ սահմանին պատի կառուցման նախագիծ մշակել, քանի որ, նրա խոսքով, Մեքսիկան ինքը պետք է վճարի: Լատինական Ամերիկայի այս երկրի իշխանությունները կտրականապես հրաժարվել են վճարել: Թրամփը խոստովանել է, որ սկզբնական շրջանում պատի համար դեռ կարող են ամերիկյան հարկատուները վճարել:
ԱՄՆ նախագահը մտորում է Մեքսիկայից այդ միջոցների ստացման այլ ուղիների շուրջ՝ օրինակ, առեւտրային մաքսատուրքեր սահմանելով կամ մեքսիկական կառավարությանը տրամադրվող օժանդակության կրճատման միջոցով: