Ժիրայր Սեֆիլյանի եւ մյուսների գործով դատական նիստին այսօր` հունվարի 12-ին, ամբաստանյալներից Հովհաննես Պետրոսյանի շահերի պաշտպան Արսեն Մկրտչյանը 18 րոպեանոց գործադուլ հայտարարեց եւ լքեց նիստերի դահլիճը: Նա հայտարարեց, որ Նոր Դատական օրենսգրքի նախագծով փաստաբանների ու դատախազների նկատմամբ որպես սանկցիա կարող է կիրառվել տուգանք մինչեւ 100 հազար դրամի չափով, եւ դա խոչընդոտում է փաստաբանների աշխատանքները, ոտնահարում իրավունքները եւ ի նշան բողոքի, 18 րոպեով լքում է նիստերի դահլիճը:
«Ես այն փաստաբանը չեմ, որ հանդուրժեմ դա եւ այս ակցիան էլ անում եմ ոչ թե PR-ի, այլ իմ իրավունքների համար եւ հենց հիմա լքում եմ նիստերի դահլիճը»,-ասաց նա:
Նշենք, որ Շենգավիթ վարչական շրջանի ընդհանուր իրավասության դատարանի շենքում գտնվող պաշտպան Տիգրան Եգորյանը չէր կարողացել մտնել նիստերի դահլիճ: Ներսես Պողոսյանի շահերի պաշտպան Արայիկ Պապիկյանը հայտարարեց, որ Տիգրան Եգորյանին ցանկանում են խուզարկել այն դեպքում, երբ պաշտպաններից ոչ մեկին չեն խուզարկել: Նրա խոսքով, Տիգրան Եգորյանի հանդեպ տարբերակված մոտեցում է ցուցաբերվում:
Նախագահող դատավոր Տաթեւիկ Գրիգորյանը նիստը 20 րոպեով ընդմիջեց:
Հիշեցնենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
Այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում:
