Մադագասկարում եւ Հարավային Աֆրիկայում կենսաբանները հայտնաբերել են նախկինում անհայտ զարմանալի հավալուսն-սարդերի 18 տեսակ, որոնք իրենց ցեղակիցների շարքում ամենաճարպիկ սպանողներից մեկն են, փոխանցում է «Մոյա պլանետան»:
Հնագույն ժամանակներում՝ 165 մլն տարի առաջ, ապրել է հավալուսնին շատ նման սարդ: Նրա սիրած ուտելիքը մյուս սարդերն էին: Այս պատմության երջանիկ ավարտը, համենայնդեպս՝ հնամիջատաբանների համար այն է, որ հավալուսն-սարդերը մինչեւ հիմա գոյություն ունեն, ըստ որում՝ շատ ավելի մեծ բազմազանութամբ, քան կենսաբանները կարծում էին նախկինում: ZooKeys ամսագրում հրապարակված հոդվածի համաձայն՝ Մադագասկարի եւ Հարավային Աֆրիկայի տարածքներում կա հավալուսն-սարդերի առնվազն 26 տեսակ: Ըստ որում՝ դրանցից 18-ը դեռեւս ոչ մի անգամ մասնագետները չեն նկարագրել:
«Ես կարծում եմ, որ ավելի շատ տեսակներ կլինեն, որոնք դեռեւս փաստաթղթավորված չեն»,- կարծիք է հայտնել Հաննա Վուդը, որը սարդերի ուսումնասիրությամբ է զբաղվում սմիթսոնյան Բնական պատմության ազգային թանգարանում, հայտնում է Live Science-ը:
Այն, թե ինչպես է հավալուսն-սարդն իր անվանումը ստացել գաղտնիք չէ: Երբ նա որս չի անում, ապա խելիցեր կոչվող իր երկար չանչերը ծալում է երկար պարանոցի երկարությամբ, որը նրան հավալուսնին է նմանեցնում: Սակայն, ի տարբերություն թռչունի, սարդի բերանը տեղադրված է նրա պարանոցի ստորին հատվածում՝ չանչերից իդելական հեռավորությամբ, որ որսը վայելի:
Հավալուսն-սարդերը լավ որսորդներ են, սակայն ի տարբերություն եղբայրակիցների՝ նրանք չեն սիրում սարդոստայն հյուսել, այլ նախընտրում են հետապնդել ավելի մանր սարդերին՝ շարժվելով նրանց հյուսած մետաքսաթելերով: Բավականին մոտենալով՝ հավալուսն սարդը «կրակում» է հզոր թունավոր ծնոտով եւ զոհին կախած պահում, որ նա չփախչի եւ իրեն վնաս չհասցնի:
