Նոյեմբերի սկզբին Քեոփսի բուրգում հայտնաբերված երեսուն մետր դատարկ տարածքը կարող է պահպանել երկաթյա երկնաքարից պատրաստված գահ։ Այս տեսությունը ներկայացրել է իտալացի աստղաֆիզիկոս Ջուլիո Մագլին, հաղորդում է «ՌԻԱ Նովոստի»-ն՝ վկայակոչելով Eurekalert-ը։
Գիտնականի խոսքով՝ հայտնաբերված դատարկությունը հազիվ թե շինարարության ժամանակ կատարված սխալ լինի կամ ճարտարապետական գործառույթ կատարի, ինչպես օրինակ՝ բուրգի հիմնական միջանցքում ծանրաբեռնվածությունը նվազեցնելու գործառույթ՝ ինչպես որոշ փորձագետներ առաջարկում էին:
«Նրանց գոյության համար պետք է լինի հիմնավոր պատճառ եւ այդ պատճառը պետք է խորապես կապված լինի եգիպտական հուղարկավորության հավատալիքներին, որը ասում է, որ մահվանից հետո փարավոնը պետք է նստած լինի երկաթե գահին, որից հետո անցնի երկնային դարպասները եւ հառնի դեպի հյուսիսային աստղերը»,-ասում է Մագլին:
Գիտնականը նշում է, որ բուրգում կա չորս «օդուղի», որից մահացած կառավարչի հոգին կարող է «դուրս գալ արտաքին աշխարհ», իսկ հյուսիսային անցուղին ավարտվում է կնքված դռանով: Դրա հետեւում, Մագլիի խոսքով, գտնվում է հայտնաբերված դատարկությունը, որտեղ, ամենայն հավանականությամբ, գահի սենյակն է:
Մագլին հիշեցնում է, որ բուրգում նախկինում հայտնաբերվել էր Քեոփսի մոր՝ Հեթեփհերեսի գահը: Այն պարունակում էր մայրիից պատրաստված ցածր փայտե հիմք, որը ծածկված էր ոսկով եւ հախճապակով:
Աշխարհի յոթ հրաշալիքներից մեկը՝ Քեոփսի բուրգը, կառուցվել է մ.թ.ա. 3-րդ հազարամյակի կեսերին, Հին Թագավորության չորրորդ դինաստիայի ներկայացուցիչ փարավոն Հուֆուի (Քեոփս) ժամանակաշրջանում՝ այն նույն ժամանակ, երբ կառուցվել են Հին Եգիպտոսի բոլոր «խոշոր բուրգերը»: 145 մետր բարձրությամբ եւ 230 մետր լայնությամբ այս կառույցը մնում է մարդկության կողմից կառուցված ամենաբարձր եւ խոշոր կառույցների շարքում: