ԱՄՆ-ն ԵԱՀԿ-ում Իտալիայի նախագահությանը կոչ է անում աջակցել ղարաբաղյան հակամարտության կարգավորման գործընթացում Մինսկի խմբի ջանքերին: Այս մասին հայտարարել է ԱՄՆ գործերի հավատարմատար Հարրի Քամիանը՝ ելույթ ունենալով Վիեննայում
«Ինչ վերաբերում է Լեռնային Ղարաբաղի հակամարտությանը, մենք ձեզ կոչ ենք անում լիակատար եւ անվարան աջակցություն ցուցաբերել ձեր անձնական ներկայացուցչին ու նրա առաքելությանն ի աջակցություն հակամարտության խաղաղ եւ ամուր լուծում գտնելու Մինսկի խմբի ջանքերին: Մենք պետք է հաշվի առնենք վերջին հուսադրող ազդակները, որոնք գրանցվել են 2017 թվականին Ժնեւում անցկացված Հայաստանի եւ Ադրբեջանի նախագահների գագաթնաժողովում»,- նշել է Քամիանն իր ելույթում՝ ի պատասխան գործող նախագահ Անջելինո Ալֆանոյի հայտարարության:
Հիշեցնենք, որ Վիեննայում Իտալիայի նախագահության առաջնահերթությունները ներկայացնելիս այս երկրի ԱԳ նախարար, ԵԱՀԿ գործող նախագահ Անջելինո Ալֆանոն ասել էր, որ իրենք «կսատարեն Մինսկի խմբի համանախագահների աշխատանքը, որպեսզի գտնեն այս հակամարտության վերջնական համաձայնեցված լուծումը»: