Հայաստանի կառավարությունում արագորեն աճում է այն մարդկանց թիվը, ովքեր վախենում են աջակողմյան ղեկով ավտոմեքենա նստել:
Հիշեցնենք, որ նոր տեսակի ֆոբիայի հայտնաբերման հեղինակ է դարձել ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը: Աջակողմյան ղեկով ավտոմքենաների կողմնակիցների հետ հանդիպման ժամանակ փոխադրամիջոցի ապահովության եւ անվտանգության մեջ համեզվելու համար նախարարին առաջարկվեց շրջել այս տեսակի ավտոմեքենայով: Նախարարը կտրականապես մերժեց առաջարկը՝ նշելով, որ ինքը «կամիկաձե» չէ:
Պարզվեց, որ նախարարը Հայաստանի կառավարությունում միակը չէ, ով վախենում է նստել աջակողմյան ղեկով ավտոմեքենա: Բողոքի ակցիայի մասնակիցների հետ զրույցում Քաղաքացիների ընդունելության եւ դիմումների քննարկման վարչության պետ Ալեքսանդր Ղազարյանը նշեց, որ իր որդին նույնպես աջակողմյան ղեկով ավտոմեքենա է վարում:
Պարզվեց, որ Ղազարյանը որդու մեքենա մեկ անգամ է նստել եւ վերընշված նկատառումներով այլեւս չի պատրաստվում դա անել: Այնուհետեւ պարզվեց, որ Ղազարյանի դուստրը եւս աջակողմյան ղեկով ավտոմեքենա է վարում: Նրա մեքենա պաշտոնյան բացարձակապես չի համարձակվում նստել եւ ընդհանրապես դեմ է, որպեսզի դուստրը ավտոմեքենա վարի: Չնայած աջակողմյան ավտոմեքենաների «վտանգին»՝ Ղազարյանի երեխաները բարեբախտաբար երբեք ավտովթարի չեն ենթարկվել:
Ակտիվիստների հետ տեւական զրույցը էմոցիոնալ բնույթ էր կրում: Երբ Ղազարյանի հետեւում ցուցարարներից մեկը հերթական անգամ ռեպլիկ բաց թողեց, պաշտոնյայի նյարդերը տեղի տվեցին, եւ նա ռեպլիկի հեղինակին առաջարկեց կա՛մ արտահայտվել, կա՛մ հանդիպել երեկոյան 6-ից հետո: Թեման չշարունակվեց: