Իրանը հայտնել է, որ քայլեր է ձեռնարկելու ու «համապատասխան ձեւով պատասխանելու է ԱՄՆ թշնամական գործողություններին», հայտնում է ՌԻԱ Նովոստին՝ վկայակոչելով Իրանի ԱԳՆ հայտարարությունը։
Ավելի վաղ ԱՄՆ-ն պատժամիջոցային ցուցակում էր ընդգրկել այաթոլա Սադիկ Լարիջանիին, Իրանի դատական համակարգի ղեկավարին։
«Լարիջանիին պատժամիջոցային ցուցակում ընդգրկելու վերաբերյալ Թրամփի վարչակազմի թշնամական ու ապօրինի գործողությունները ․․․ հատել են միջազգային համայնքում վարքագծի բոլոր թույլատրելի սահմանները ու ԱՄՆ երկկողմանի ու միջազգային պարտավորությունների տեսակետից միջազգային իրավունքի խախտում են, որին անկասկած Իրանը լրջորեն կարձագանքի»,- ասվում է Իրանի ԱԳՆ հայտարարության մեջ։
Բացի դրանից ԱԳՆ հայտարարության մեջ ասվում է, որ մի շարք իրանցիների պատժամիջոցային ցուցակում ընդգրկելու՝ ԱՄՆ որոշումը «ընդամենը ապացուցում է իրանական մեծ ազգի հանդեպ ԱՄՆ կառավարոււթյան շարունակվող թշնամանքը»։
Ավելի վաղ ԱՄՆ նախագահ Դոնալդ Թրամփը հայտնել էր, որ վերջին անգամ է երկարաձգել Իրանի «միջուկային համաձայնագրի» շրջանակում պատժամիջոցների չեղարկման ժամկետը ու ԵՄ-ից պահանջել էր մասնակցել համաձայնագրի փոփոխմանը, նշելով, որ հիմա փոփոխությունների համար վերջին հնարավորությունն է ։ Բացի դրանից Թրամփը Իրանին անվանել էր ահաբեկչության գլխավոր հովանավոր ու ասել, որ մտադիր է օրենսդրորեն ամրագրել կոշտ պատժամիջոցներ Իրանի կողմից բալիստիկ հրթիռների մշակման ու փորձարկման համար։