Մոսկվան չափազանց մտահոգված է Իրանի դեմ ԱՄՆ նոր ընդլայնված պատժամիջոցային ցանկով, այդ թվում՝ այդ ցանկում արտասահմանյան քաղաքացիների ընդգրկմամբ, հայտարարել է ՌԴ ԱԳ փոխնախարար Սերգեյ Ռյաբկովը, փոխանցում է «ՌԻԱ Նովոստի»-ն:
Ինչ վերաբերում է ԵՄ-ին ուղղած Թրամփի կոչերին՝ աշխատել Իրանի հարցով նոր համաձայնագրի վրա, Ռյաբկովը հայտարարել է. «Մեզ անհանգստացնում է, որ ԱՄՆ-ն ավելի շատ է դիմում շանտաժի եւ ճնշման»:
Նա ընդգծել է, որ Մոսկվան ուշադրություն է դարձնում այն բանին, որ Համատեղ գործողությունների համապարփակ ծրագրի ճակատագրի վերաբերյալ Թրամփի հայտարարությունները շատ ուշադիր կուսումնասիրեն Հյուսիսային Կորեայում եւ մի շարք այլ երկրներում:
ԱՄՆ իշխանությունները նախօրեին հայտարարել են Իրանի դեմ նոր պատժամիջոցների մասին, որոնք տարածվում են 5 ֆիզիկական անձանց եւ 9 կառույցների վրա: ԱՄՆ Ֆինանսների նախարարության կայքում հրապարակված տեղեկությունների համաձայն՝ այսպես կոչված, «կրկնակի պատժամիջոցների» «սեւ ցուցակի» մեջ են ներառվել Իսլամական հեղափոխության պահապանների կորպուսի կիբերպաշտպանության վարչությունը, Գերագույն խորհուրդը ե կիբերտարածքի Ազգային կենտրոնը: ԱՄՆ-ն պատժամիջոցներ է սահմանել նաեւ Իրանի դատական համակարգի ղեկավար, այաթոլլահ Սադիկ Լարիջանիի դեմ:
Դրանից բացի, պատժամիջոցային ցուցակում են հայտնվել Չինաստանի 2 քաղաքացի եւ մեկ ընկերություն:
Թրամփը որոշել է երկարաձգել Իրանի պատժամիջոցների վերացման ռեժիմը