«Սասնա ծռեր» խմբի անդամ Հովհաննես Հարությունյանի պաշտպան Հայարփի Սարգսյանն հաղորդում է ներկայացրել այն մասին, որ արդարադատության նախկին եւ ներկայիս նախարարները եւ Նուբարաշեն ՔԿՀ պետը չարաշահել են իրենց լիազորությունները: Այս մասին NEWS.am-ի հետ զրույցում ասաց փաստաբան Հայարփի Սարգսյանը՝ մանրամասնելով, որ դեռևս 2017թ. դեկտեմբերի 11-ին ինքը ներկայացրել է հաղորդում հանցագործության մասին՝ կապված Հովհաննես Հարությունյանի նկատմամբ կյանքին ու առողջությանը սպառնացող վտանգի հետ, սակայն մինչեւ օրս Գլխավոր դատախազությունից որևէ արձագանք, որևէ պատասխան չի ստացել:
«Ես բազմաթիվ անգամներ դիմել եմ ներկայիս եւ նախկին արդարադատության նախարարներին եւ քրեակատարողական հիմնարկի պետին, որպեսզի պատշաճ բուժում ստանա իմ պաշտպանյալը, սակայն իմ բոլոր դիմումները մերժվել են, ուստի ես գտնում եմ, որ այդ պաշտոնյաները կատարել են հանցագործություն, եւ այդ հիմքով էլ ներկայացրել հաղորդում նացագործության մասին»,-ասաց Հայարփի Սարգսյանը:
Փաստաբանը նշեց, որ ինքը պատասխան չի ստացել ՀՀ գլխավոր դատախազութունից, եւ դրա հիման վրա բողոք է ներկայացրել Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարան ` դատախազության անգործության դեմ:
«Նույն օրը դատախազությունից պատասխան ստացա, որ իմ ներկայացրած հաղորդումը չի քննվելու»,-ասաց Հայարփի Սարգսյանը` հավելելով, որ այս պահին սպասում է դատարանի որոշմանը:
Հիշեցնենք, որ Հովհաննես Հարությունյանը ոտքի ծանր վիրավորում էր ստացել ոստիկանության ՊՊԾ գնդի տարածքում:
Հովհաննես Հարությունյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասի 1-ին կետով (Շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից): Նա կալանավորված է: