Չիլիի կառավարությունը պահանջում է, որ Համաշխարհային բանկը (ՀԲ) հետաքննություն անցկացնի Doing Business-ի վարկանիշային ցուցակի կազմման ժամանակ Չիլիի մրցունակության մասին տվյալների աղավաղման վերաբերյալ: Այս մասին հայտարարել է հարավամերիկյան հանրապետության նախագահ Միշել Բաչելետը, հաղորդում է ՏԱՍՍ-ը:
«Հաշվի առնելով տեղի ունեցածի լրջությունը՝ որպես կառավարություն մենք պաշտոնապես Համաշխարհային բանկից պահանջում ենք ամբողջական հետաքննություն: Միջազգային կառույցների կողմից կազմվող վարկանիշները պետք է հուսալի լինեն, քանի որ դրանք ազդում են ներդրումների եւ երկրների զարգացման վրա»,-գրել է նա իր թվիթերյան էջում։
Չիլիի էկոնոմիկայի, զարգացման եւ զբոսաշրջության նախարար Խորխե Ռոդրիգես Գրոսին, իր հերթին, այդ մանիպուլյացիոն գործողությունն անվանել է «անբարոյական քայլ»: «Հուսով ենք, որ ինդեքսի ճշգրտումը արագ կլինի, բայց վնասն արդեն հասցվել է: Հուսով ենք, որ վիճակագրությունն այլեւս երբեք չի մանիպուլացվի քաղաքական նպատակների համար, հատկապես այնպիսի միջազգային մարմնի կողմից՝ ինչպիսին Համաշխարհային բանկն է»,- նրա խոսքերը փոխանցում է Canal 13 հեռուստաալիքը:
Ավելի վաղ The Wall Street Journal-ին տված հարցազրույցում ՀԲ գլխավոր տնտեսագետ Պոլ Ռոմերը հայտարարել էր, որ կազմակերպությունը կճշգրտի Doing Business-ի վարկանիշային ցուցակները վերջին չորս տարիների ընթացքում, քանի որ դրանք կարող են անարդարացիորեն կազմված լինել որոշ երկրների նկատմամբ: