Տրանսպորտի, կապի եւ տեղեկատվական տեխնոլոգիաների նախարարությունը ավելի լավ է ճանապարհների վերանորոգման հարցերը լուծի, այլ ոչ թե ճանապարհային հարկի գները բարձրացնի: Այս մասին NEWS.am-ի հետ զրույցում ասաց «Ավտովարորդների պաշտպանության լիգա» հասարակական կազմակերպության նախագահ Տիգրան Հովհաննիսյանը:
«Ես խորհուրդ կտայի տրանսպորտի նախարարությանը, որ հայրենական մեծ պատերազմի ժամանակների ճանապարհները առաջին հերթին վերանորոգեին, նոր ճանապարհային հարկը բարձրացներին, փող ուզեին: Բեռնատարները մեղք են, ճանապարհ չունեն, ինչ փող ուզեն նրանցից: Սա էլ կաշառքի նման մի բան է ստացվում»,-ասաց Տիգրան Հովհաննիսյանը:
Նրա կարծիքով` դեռ հակառակը, մի բան էլ Տրանսպորտի նախարարությունը պետք է վճարի բեռնատարների վարորդներին եւ շնորհակալություն հայտնի, որ նման անմխիթար ճանապարհներով են նրանք երթեւեկում:
Նշենք, որ հարկային նոր օրենսգրքով ճանապարհային հարկ է սահմանվում Հայաստանում չհաշվառված բեռնատարների համար: Մասնավորապես, 15 օրվա համար մինչեւ 700 հազարի կարող է հասնել հարկը՝ կախված բեռնատարի քաշից: