2010 թվականը բարդ էր, երկրի առջեւ լուրջ խնդիրներ էին ծառացած, սակայն դրանց հաղթահարման ուղղությամբ որոշակի արդյունքների հաջողվել է հասնել, հատկապես տնտեսական ճգնաժամի հետեւանքների վերացման ուղղությամբ, NEWS.am-ի թղթակցի հետ զրույցում հայտարարել է Հանրապետական խմբակցության ղեկավար Գալուստ Սահակյանը:
Ըստ նրա, Առավել լուրջ ձեռքբերումների հաջողվել է հասնել արտաքին քաղաքականության ոլորտում, քանի որ Հայաստանի դիրքորոշումը շատ հարցերում, եւ մասնավորապես. ղարաբաղյան խնդրում արձագանք են գտել միջազգային հանրության մեջ: «Միջազգային փաստաթղթերում գերակայություն տրվեց ժողովուրդների ինքնորոշման իրավունքին»,- հավաստիացրել է Սահակյանը:
Սակայն, Գալուստ Սահակյանի ներկայացմամբ, դեռ կան շատ չլուծված խնդիրներ, հատկապես սոցիալական ոլորտում: «Բարձր է մնում գործազրկության մակարդակը, այդ խնդիրները մենք մեր հետ կտանենք 2011թ.: Թեեւ կան դրանց հաղթահարման նախադրյալներ, եթե իհարկե, ֆորս-մաժոր չլինի»,- հայտարարել է Սահակյանը՝ նկատելով, որ այսօր աշխարհում կատակլիզմներ են լինում, որոնք կարող են անդրադառնալ հայաստանի վրա:
Կանխատեսելով քաղաքական իրադարձությունների հետագա զարգացումը, Սահակյանը նշել է, որ այսօր արդեն Հայաստանում նախընտրական գործընթացներ են սկսվել: «Մեզ քաղաքական վերադասավորումներ են սպասվում, իսկ 2011թ. վերջին քաղաքական գործընթացների ակտիվացում կլինի»,- կանխատեսել է պատգամավորը: