Ադրբեջանական հատուկ ծառայությունները ռուսաստանցի գիտնականին պահում են իր կամքին հակառակ։
Ավելի վաղ հայտնել էինք, որ Ռուսաստնի գիտությունների ակադեմիայի Աստղագիտության ինստիտուտի աշխատակից, գիտնական Դմիտրի Չուլկովը,որը ժամանել էր Ադրբեջան որպես զբոսաշրջիկ, անհետացել է սահմանամերձ գոտի այցելելուց հետո։ «ՌԻԱ նովոստի»-ին նրա մայրը հայտնել է, որ որդին Մոսկվայից ուղիղ չվերթով մեկնել է Գյանջա։ Երկու օր անց նա որոշել է այցելել Գյոյգյոլ լիճ, որից հետո նրա հետ կապը ընդհատվել է։ Չուլկովը Ադրբեջանից պետք է թռչեր հունվարի 10-ին, սակայն ավիաընկերությունում հայտնել են, որ նա օդանավ չի նստել: «Ոչ պաշտոնական տվյալներով՝ նա ձերբակալվել է սահմանային աշխատակիցների կողմից»,-նշել է Օլգա Չուլկովան։
«Նա մուտք է գործել արգելված գոտի, որտեղ նրան բռնել են»,-նշել է Գյանջայւմ գտնվող հյուրանոցի տերը, որտեղ ապրել է Չուլկովը։ Նա հստակեցրել է, որ նրա հետ կապ են հաստատել պետական անվտանգության աշխատակիցները, որոնք ժամանել են հյուրանոց, հարցրել են երիտասարդի մասին եւ առգրավել են նրա իրերը։ Նրանք ասել են, Չուլկովը դիտմամբ անցել է պահպանվող տարածքի ցանկապատը եւ հրաժարվել է ենթարկվել թիկնապահների պահանջներին։ Հետագայում Օլգա Չուլկովան հայտնել է, որ Դմիտրին կապ է հաստատել իր հետ։
«Նրան թույլ են տվել զանգահարել: Պատմեց, որ ուտելիք են տալիս իրեն, շուտով խոստացել են ազատ արձակել եւ ուղարկել Մոսկվա: Մի քանի անգամ կրկնեց, որ չեն ծեծել իրեն»,-պատմել է կինը: Չուլկովայի խոսքով՝ իր հետ կապ են հաստատել Ռուսաստանի դեսպանատանից եւ հավաստիացրել, որ երիտասարդին ոչինչ չի սպառնում:
«Ադրբեջանում Ռուսաստանի դեսպանությանը տեղական իշխանությունները տեղյակ են պահել Ռուսաստանի քաղաքացու ձերբակալման մասին, միջոցներ են ձեռնարկվում նրա հնարավորինս շուտ հայրենիք վերադարձնելու համար»,-ռուսական լրատվամիջոցներին հաղորդել է Ռուսաստանի դիվանագիտական առաքելության մամուլի կցորդ Դենիս Ապաշկինը:
Ադրբեջանի պետական անվտանգության ծառայությունում եւ Ներքին գործերի նախարարությունում Turan գործակալությունը մեկնաբանություն չեն տվել Չուլկովի կալանավորման շուրջ: