«2010 թվականը արտաքին քաղաքականության առումով Հայաստանի համար կարելի է հաջողված համարել»,- NEWS.am-ի թղթակցի հետ զրույցում ասաց Արեւելագիտության ինստիտուտի տնօրեն Ռուբեն Սաֆրաստյանը:
Հայաստանի ձեռքբերումների թվում նա առանձնացրեց Հայաստանում ռուսական ռազմակայանի տեղակայման ժամկետի երկարաձգման փաստը: Փորձագետը նաեւ նկատեց, որ 2010-ին Հայաստանն ամրապնդեց ղարաբաղյան հարցի շուրջ իր դիրքորոշումները: «Դրա վկայությունը Աստանայում ԵԱՀԿ գագաթաժողովին հայկական դիվանագիտության հաջողությունն էր»,- նկատեց Սաֆրաստյանը: Նա նաեւ կարեւորեց այն հանգամանքը, որ 2010-ի ընթացքում Հայաստանը խորացրեց եվրոպական կառույցներ հետ համագործակցությունը:
2011 թվականին, Սաֆրաստյանի կարծիքով, աշխարհն ուշադրությունը պետք է սեւեռի ադրբեջանական ագրեսիայի վրա: «Իսկ հայկական կողմը պետք է կարողանա առաջ տանել ազգերի ինքնորոշման իրավունքի սկզբունքը, մանավանդ` 2010-ին դրա համար լավ նախապայմաններ են ստեղծվել»,- ամփոփեց փորձագետը:
«Ինչ վերաբերում է ներքին գործընթացների, ապա 2011-ին ցնցումների չարժե սպասել, իշխանությունները կկարողանան պահպանել ներքին կայունությունը»,- հավաստիացրեց Սաֆրաստյանը: